Gin it hadna been an auld carl, Robin Ruthven, Auchtermuchty wad at that time hae been ruined and lost for ever. But Robin was a cunning man, an' had rather mae wits than his ain, for he had been in the hands o' the fairies when he was young, an' a' kinds o' spirits were visible to his een, an' their language as familiar to him as his ain mother tongue. Robin was sitting on the side o' the West Lowmond, ae still gloomy night in September, when he saw a bridal o' corbie craws coming east the lift, just on the edge o' the gloaming. The moment that Robin saw them, he kenned, by their movements, that they were craws o' some ither warld than this; so he signed himself, and crap into the middle o' his bourock. The corbie craws came a' an' sat down round about him, an' they poukit their black sooty wings, an' spread them out to the breeze to cool; and Robin heard ae corbie speaking, an' another answering him; and the tane said to the tither: "Where will the ravens find a prey the night?" "On the lean crazy souls o' Auchtermuchty," quo the tither. "I fear they will be o'er weel wrappit up in the warm flannens o' faith, an clouted wi' the dirty duds o' repentance, for us to mak a meal o'," quo the first. "Whaten vile sounds are these that I hear coming bumming up the hill?" "Oh, these are the hymns and praises o' the auld wives and creeshy louns o' Auchtermuchty, wha are gaun crooning their way to Heaven; an', gin it warna for the shame o' being beat, we might let our great enemy tak them. For sic a prize as he will hae! Heaven, forsooth! What shall we think o' Heaven, if it is to be filled wi' vermin like thae, amang whom there is mair poverty and pollution than I can name." "No matter for that," said the first, "we cannot have our power set at defiance; though we should put them on the thief's hole, we must catch them, and catch them with their own bait, too. Come all to church to-morrow, and I'll let you hear how I'll gull the saints of Auchtermuchty. In the meantime, there is a feast on the Sidlaw hills tonight, below the hill of Macbeth--Mount, Diabolus, and fly." Then, with loud croaking and crowing, the bridal of corbies again scaled the dusky air, and left Robin Ruthven in the middle of his cairn.