"Are ye really gaun to act the part of a devil, the day, Mr Adamson, and turn me and thae bairns out to the bare high-road, helpless as we are? Oh, man, if your bowels binna seared in hell-fire already, take some compassion; for an ye dinna, they _will_ be seared afore baith men and angels yet, till that hard and cruel heart o' yours be nealed to an izle." "I'm gaun to act nae part of a devil, Mrs Irvine; I'm only gaun to take my ain in the only way I can get it. I'm no baith gaun to tine my siller, and hae my beasts abused into the bargain." "Ye sall neither lose plack nor bawbee o' your siller, man, if ye will gie me but a month to make a shift for it--I swear to you, ye sall neither lose, nor rue the deed. But if ye winna grant me that wee wee while, when the bread of a haill family depends on it, ye're waur than ony deil that's yammering and cursing i' the bottomless pit." "Keep your ravings to yoursell, Mrs Irvine, for I hae made up my mind what I'm to do; and I'll do it; sae it's needless for ye to pit yoursell into a bleeze; for the surest promisers are aye the slackest payers. It isna likely that your bad language will gar me alter my purpose." "If that _be_ your purpose, Mr Adamson, and if you put that purpose in execution, I wadna change conditions wi' you the day for ten thousand times a' the gear ye are worth. Ye're gaun to do the thing that ye'll repent only aince--for a' the time that ye hae to exist baith in this world and the neist, and that's a lang lang look forrit and ayond. Ye have assisted a poor honest family for the purpose of taking them at a disadvantage, and crushing them to beggars; and when ane thinks o' that, what a heart you must hae! Ye hae first put my poor man in prison, a place where he little thought, and less deserved, ever to be; and now ye are reaving his sackless family out o' their last bit o' bread. Look at this bit bonny innocent thing in my arms, how it is smiling on ye! Look at a' the rest standing leaning against the wa's, ilka ane wi' his een fixed on you by way o' imploring your pity! If ye reject thae looks, ye'll see them again in some trying moments, that will bring this ane back to your mind; ye will see them i' your dreams; ye will see them on your death-bed, and ye will _think_ ye see them gleaming on ye through the reek o' hell,--but it winna be them." "Haud your tongue, woman, for ye make me feared to hear ye."