“Hear ye, laddie,” he said, “gin ye come to the pairish o’ Balmaghie ye will need the legs o’ a racer horse, and the airms o’ Brawny Kim, the smith o’ Carlinwark. Never a chiel has been fit to be the minister o’ Balmaghie since Auld Mess Hairry died! “He was a man--losh me, but he _was_ a man! “I tell ye, sir, this pairish needs its releegion tightly threshed into it wi’ a flail. Sax change-houses doon there hae I kenned oot o’ seven cot-houses at the Kirk-clachan o’ Shandkfoot, and a swearin’, drinkin’ set in ilka yin o’ them. “And siccan reamin swatrochs of Hollands an’ French brandy, lad! Every man toomin’ his glass and cryin’ for mair, tossing it ower their thrapples hand ower fist, as hard as the sweatin’ landlords could open the barrels. And the ill words and the fechtin’--Lord, callant, ye never heard the like! They tell me that ye come frae the Kells. A puir feckless lot they are in the Kells! Nae spirit in their drink. Nae power or variety in their oaths and cursings! “But Balmaghie!---- That was a pairish in the old time, till Mess Hairry came in the days after John Knox. He had been a Papish priest some-gate till he had turned his cassock alang wi’ dour black Jock o’ the Hie Kirk o’ Edinburgh. But Mess Hairry they aye caa’ed him, for a’ that. And there were some that said he hadna turned that very far, but was a Papish as great as ever under the black Geneva gown! “For he wad whiles gie them swatches o’ the auld ill-tongued Laitin, till the folk kenned na whether they werena bein’ made back again into limbs o’ Rome, and their leave never so much as speered. “But Pope or reform, mass or sacrament, the pairish cared no a bursten chanter. Doon at the clachans the stark Hollands flowed like the water in a running spate, and the holy day o’ the Sabbath was their head time for the evil wark--that is, till Mess Hairry cam’, and oh, but he was the maisterfu’ man, as my auld grandfaither used to say. What did he?--man, I will tell ye. And let it be a lesson to ye, young man, gin ye come to the pairish o’ Balmaghie. The folk here like a tairgin’ maisterfu’ man. Hark ye to that! They canna bide chiels that only peep and mutter. The lads atween the waters o’ Dee and Ken tak’ a man maistly at his ain valuation, and if a minister thinks na muckle o’ himself--haith, they will e’en jaloose that he kens best, and no think muckle o’ him either! “At ony rate, the drinking gaed on, as I was tellin’ ye, till yae day it cam’ to a head. There had been a new cargo brought into the Briggus--it was afore the days o’ the ill-set customs duties--foul fa’ them and the officers that wad keep a man frae brewin’ his decent wormfu’, or at least gar him tak’ the bother o’ doin’ it in the peat-stack or on some gairy-face instead o’ openly on his kitchen floor.