Ane weel great while there dwellit he: All men loved him for his bountie; For he was of full fair effere, Wise, courteous, and debonair; Large and lovand also was he, And ower all thing loved loyauty. Loyautie to love is gretumly; Through loyautie men lives richtwisely; With a virtue of loyautie Ane man may yet sufficiand be; And, but loyautie, may nane have prize, Whether he be wicht or be he wise; For, where _it_ failis, nae virtue May be of prize, ne of value To mak ane man sae good that he May simply callit good man be. He was in all his deedès leal; For him dedeignit not to deal With treachery ne with falsét. His heart on high honóur was set, And him contened in sic manére That all him loved that war him near. But he was not sae fair that we Suld speak greatly of his beautíe. In visage was he somedeal grey, And had black hair, as I heard say; But of his limbs he was well made, With banès great and shoulders braid; His body was well made leanlie, As they that saw him said to me. When he was blythe, he was lovely And meek and sweet in company; But wha in battle micht him see All other countenance had he. And in speech lispit he somedeal; But that set him richt wonder weel. To Good Hector of Troy micht he In mony thingès likenit be. Hector had black hair as he had, And stark limbès and richt weel made, And lispit also as did he, And was fulfillit of loyautie, And was courteous, and wise, and wicht.