For on the morwe sone as it was day To his felawes inne he toke his way, And whan that he came to this oxes stalle After his felaw he began to calle. The hosteler answered him anon, And saide, Sire, your felaw is agon; As sone as day he went out of the toun. This man gan fallen in suspecioun, Remembring on his dremes that he mette, And forth he goth, no lenger wold he lette, Unto the west gate of the toun, and fond A dong carte as it went for to dong lond, That was arraied in the same wise As ye han herde the dede man devise; And with an hardy herte he gan to crie Vengeance and justice of this felonie; My felaw mordred is this same night, And in this carte he lith gaping upright. I crie out on the ministres, quod he, That shulden kepe and reulen this citee: Harow! alas! here lith my felaw slain. What shuld I more unto this tale sain? The peple out stert, and cast the cart to ground, And in the middle of the dong they found The dede man that mordred was all newe. O blisful God! that art so good and trewe, Lo, how that thou bewreyest mordre alway! Mordre wol out, that see we day by day: Mordre is so wlatsom and abhominable To God, that is so just and resonable, That he ne wol not suffre it hylled be: Though it abide a yere, or two or three, Mordre wol out; this is my conclusioun. And right anon the ministres of the toun Han hent the carter, and so sore him pined, And eke the hosteler so sore engined, That they beknewe hir wickednesse anon, And were anhanged by the necke bon. Here moun ye see that dremes ben to drede. And certes in the same book I rede, Right in the next chapitre after this, (I gabbe not, so have I joye and blis) Two men that wold han passed over the see, For certain cause, in to a fer contree, If that the winde ne hadde ben contrarie, That made hem in a citee for to tarie That stood ful mery upon a haven side: But on a day, agein the even tide, The wind gan change, and blew right as hem lest: Jolif and glad they wenten to hir rest, And casten hem ful erly for to saile; But to that o man fel a gret mervaile. That on of hem in sleping as he lay He mette a wondre dreme again the day: Him thought a man stood by his beddes side, And him commanded that he shuld abide, And said him thus; If thou to-morwe wende Thou shalt be dreint; my tale is at an ende. He woke, and told his felaw what he met, And praied him his viage for to let; As for that day he prayd him for to abide. His felaw, that lay by his beddes side, Gan for to laugh, and scorned him ful faste: No dreme, quod he, may so my herte agaste That I wol leten for to do my thinges: I sette not a straw by thy dreminges, For swevens ben but vanitees and japes: Men dreme al day of oules and of apes,