These oure Petitionis being proponed, the Estate Ecclesiasticall began to storme, and to devise all maner of leys to deface the equitie of our caus. Thei bragged as that thei wald have publict disputatioun, which also we most earnestlie requyred, two thingis being provided; the formare, that the plane and writtin Scriptures of God shuld decyde all contraversie; [SN: DISPUTATIOUN WITH CONDITIONIS.] Secoundlie, that our brethrene, of whom some war then exiled, and by them injustlie dampned, myght have free accesse to the said disputatioun, and salf conduct to returne to thair duelling places, nochtwithstanding any processe whiche befoir had bene led aganis thame in materis concernyng religioun. [SN: THE OFFER OF THE PAPISTIS.] But these being by thame utterlie denyed, (for no judge wold thei admitt bot thame selfis, thare Counsallis, and Cannon law,) thei and thare factioun began to draw certane Articles of reconciliation, promissing unto us, yf we wold admitt the Messe, to stand in hir formare reverence and estimatioun, grant Purgatorie after this lyiff, confesse Prayer to Sanctes and for the dead, and suffer thame to enjoye thare accustomed renttis, possession, and honour, that then thei wold grant unto us to pray and baptize in the vulgare toung, so that it war done secreatlie, and nott in the open assemblie. But the grosness of these Articles wes suche, that with ane voce we refused thame; and constantlie craved justice of the Quein Regent, and a reasonable answer of our formare Petitionis. [SN: THE GRANT OF THE QUEIN REGENT.] The Quein, then Regent, ane woman crafty, dissimulate, and fals, thinking to mak hir proffeit of both parteis, gave to us permissioun to use our selfis godlye according to our desyres, providit that we should not maik publict assembleis in Edinburgh nor Leyth; and did promeise hir assistance to our Preacheouris, untill some uniforme ordour myght be established by a Parliament. To thame, (we meane to the Cleargy,) she quietlie gave significatioun of hir mynd, promissing that how sone any oportunitie should serve, she should so putt ordour in thare materis, that after thei should not be trubled; for some say thei gave hir a large purse,[750] 40,000 lib., sayis the Chronicle,[751] gathered by the Lard of Erleshall.[752] We, nothing suspecting hir dowblenes nor falshode, departed, fullelie contented with hir answer; and did use our selfis so qwietlie, that for hir pleasour we putt silence to Johne Dowglass, who publictlie wold have preached in the toune of Leyth; for in all thingis we soght the contentment of hir mynd, so far furth as God should not be offended against us for obeying hir in thingis unlawfull. [SN: THE APPREHENSION OF WALTER MYLLE.]