POLECIE we call ane exercise of the Churche[529] in suche thingis as may bring the rude and ignorant to knawledge, or ellis inflambe the learned to greater fervencie, or to reteane the Churche in gude ordour. And thairof thair be two sortis: the one utterlie necessarie; as that the word be treulie preched, the sacramentis richtlie ministrat, common prayeris publictlie maid; that the children and rude personis be instructed in the cheaf pointis of religioun, and that offences be corrected and punisched; these thingis, we say, be so necessarie, that without the same thair is no face of ane visible Kirk. The other is proffitable, bot not of mere necessitie; as, that Psalmes suld be sung; that certane placis of the Scripturis suld be red whan thair is no sermon; that this day or that day, few or many in the weeke, the churche suld assemble. Off these and suche utheris we can not se how ane certane ordour can be establisched. For in some churcheis the Psalmes may be convenientlie sung; in utheris, perchance, thay can not. Some churcheis may convene everie day; some thryise or twise in the weeke; some perchance bot onis. In these and such like must everie particular Churche, by thair awin consent, appoint thair awin Polecie. [529] In edit. 1621, "Policie wee call an exercise of the Kirk." In greit Tounis we think expedient that everie day thair be eathir Sermon, or ellis Common Prayeris, with some exercise of reiding the Scripturis. What day the publict Sermon is, we can neathir require or gretlie approve that the Commoun Prayeris be publictlie used, least that we shall eathir fostar the peple in superstitioun, wha come to the Prayeris as thay come to the Messe; or ellis give thame occasioun to think that those be no prayeris whiche ar maid before and efter Sermon.