"Mr Andrew Todd," said the deacon, impatiently, "you are describin ane o' the maist pitifu and contemptible spirits that ever warmed the scaly body o' a reptile that has nae sting. What man wi' a spark o' independence in his breast would think o' resignin his judgment into the hands o' a woman? They are guid craturs in their ain place, and baith interestin and usefu when they are occupied in conductin the affairs o' their houses, obeyin the commands o' their husbands, and ministerin to his slichtest wishes, as if every look were an act of parliament; but, to stoop to mak a woman a counsellor, to gie her a vote in the great council o' the noble thoughts o' man's divine mind! Unheard o' humiliation! Why, man, a woman is only the twenty-fourth part o' a man, seein we hae, as the doctors say, twenty-four ribs; and we hae the authority o' Scripture for sayin that, at the very best, she is only a help to man. She was, besides, the beginnin o' a' evil. And yet this fractional thing, this help, this unlucky author o' the waes o' mortals, ye dignify and raise up into the very place and power o' yer inheritance frae Adam; reversin the order o' nature, degradin our noble sex and makin laughinstocks o' a' married men." "I'm no sure if there's muckle practical truth in a' this, deacon," said Andrew, smiling good-naturedly. "Suppose, for an instant, that, besides the satisfaction and pleasure I derive frae nestlin safely in the arms o' my wife's judgment, and courin aneath her protectin wing--whilk gies me, sometimes, a flap I like as weel as her kindest embrace--I hae discovered that her thoughts and reflections are a thousand times better than the boxmaster's--what say ye to that, deacon? I hae seen an oaken tree twenty-four times bigger than its parent, and yet a' it ever had to thank the auld stock for was an acorn. Sae, in place o' only bein a twenty-fourth part, as you say, o' man, I am satisfied I hae scarcely a twenty-fourth part o' my wife's mind; and will onybody tell me that a wise counsellor should be rejected, because she happens to be dressed in petticoats?" "Yes, Mr Todd, I will tell you that," replied the deacon. "The private sodger has dootless often a mind superior to the general's; but he maun still keep the ranks. Mind is naething in this affair--station is everything. Look at Mrs Margaret Waldie--a cleverer cratur doesna exist--that is, in her ain way; but did she ever dare to counsel me? Did she ever presume to sway or alter, in the slightest degree, the decrees o' my judgment? Na; she has owre muckle respect for the status and respectability o' her lord and maister. Rouse yersel, Andrew; tak example by me, man; act as your kind heart prompts in this freendly affair; and join me in the bond, whereby you'll incur nae danger."