Que le Diable l'estant venue querir pour aller au Sabat, l'appelloit sans qu'on s'en apperceust: et luy bailloit ung certain onguent noir, duquel (appres s'etre despouillee) elle se frotoit le dos, ventre et estomac: et s'estant revestue, sortoit hors son huis, lors estoit incontinent emportee par l'air d'une grande vitesse: et se trouvoit a l'instant au lieu du Sabat, qui estoit quelquefois pres le cimetiere de la paroisse: et quelques autres fois pres le rivage de la mer, aux environs du Chateau de Rocquaine: la ou estant arivee s'y rencontroit souvent quinze ou saize Sorciers et Sorcieres avec les Diables, qu'y estoient la en forme de chiens, chats, et lievres: lesquels Sorciers et Sorcieres elle n'a peu recognoistre, parce qu'ils estoyent tous noircis et deffigures: bien est vray avoir ouy le Diable les evocquer par leur noms, et se souvaient entre autres de la _Fallaise_, et de la _Hardie_; dit confesse qu'a l'entree du Sabath: le Diable les voulant esvosquer commencoit par elle quelquefois. Que sa fille _Marie_, femme de _Massy_, a present condamnee pour pareill crime, est Sorciere: et qu'elle la menee par deux fois au Sabath avec elle: ne scait par ou le Diable la merchee: qu'au Sabath appres avoir adore le Diable, lequell se tenoit debout sur ses pieds de derriere, ils avoient copulation avec luy en forme de chien; puis dansoyent dos a dos. Et appres avoir danse, beuvoyent du vin (ne scait de quelle couleur), que le Diable versoit hors d'un pot en ung gobelet d'argent ou d'estrain; lequell vin ne luy sembloit sy bon que celuy qu'on boit ordinarement; mangeoist aussy du pain blanc quj leur presentoit--n'a jamais veu de sell au Sabath. Confesse que le Diable luy avoit donne charge d'appeler en passant _Isebell le Moygne_: lors quelle viendroit au Sabath, ce qu'elle a fait diverses fois. Qu'au partir du Sabath le Diable l'incitoit a perpetrer plusieurs maux: et pour cest effect luy bailloit certaines pouldres noires, qu'il lui commandoit de ietter sur telles personnes et bestes qu'elle voudroit; avec laquelle pouldre elle a perpetre plusieurs maux desquels ne se souvient: entres autres en ietta sur _Mes. Dolbell_, ministre de la paroisse: et fut occasion de sa mort par ce moyen. Par ceste mesme pouldre ensorcela la femme de _Jean Maugues_: toutesfois nie qu'elle soit morte par son sort: qu'elle toucha par le coste, et ietta de ceste pouldre sur la femme defuncte de _Mr Perchard_, successeur ministre du dit _Dolbell_, en ycelle paroisse, ycelle estant pour lors enceinte, tellement qu'elle la fist mourir et son fruit--ne scait quelle occasion luy fut donnee par la dite femme. Que sur le refus que la femme de _Collas Tottevin_ luy fist de luy donner du laict: elle fist assecher sa vache, en iettant sur ycelle de ceste pouldre: laquelle vache elle regarit par appres en luy faisant manger du son, et de l'herbe terrestre que le Diable lui bailla.