It was enacted in the third year of the reign of Edward IV. c. 1:--"Firste, whereas many yeres paste & nowe at this daye, the workemanshyp of clothes & things requisite to the same, is & hath bene of such fraude disceite & falsite, that the sayde clothes in other landes & countreis, is had in small reputacyon, to the greate shame of this lande. And by reason thereof a great quantite of clothes of other strange landes be brought into this realme, & here solde at an highe & excessyve pryce, evydently shewynge thossens defaulte & falsyte of the maykynge of wollen clothes of this lande. Our soveraigne lorde the Kynge, for the remedy of the premisses, & to the preferment of such labours & occupacions, which hath been used by the makynge of the sayde clothes, by thaduyse assent & request & auctoritie aforsayd, hath ordeyned & establysshed, that every hole wollen clothe called brodclothe, which shal be made & set to sale after the feaste of Saynt Peter called ad vincula, which shal be in the yere of our Lorde M.CCCC.LXV. after the ful waterynge & rackyng straynyng or tenturyng of the same redy to sale, shall holde & conteyne in length xxiiii yardes, & to every yarde an ynche, conteynynge the bredthe of a mannes ynche, to be measured by the creste of the same clothe. And i brede ii yardes, or vii quarters at the leaste wythyn the lystes. & if the clothe be longer in measure than xxiiii yardes & the ynches than the byer therof shall paye to the seller for for as moche as doth excede such measure of xxiiii yardes, after the rate of the measure above ordeyned. Also it is ordeined & establisshed by auctoritie of the sayd lordes, that all maner clothes called streytes, to be made & put to sale after the same feaste, after the full watering & rackyng, streynynge or tenturynge therof redye to sale, shall holde & conteyne in lengthe xii yardes & the ynches, after the measure aforsaid, & in brede one yarde within the lystes. Also it is ordeyned & establysshed by thauctoritie aforsaid, that every clothe called kersey, to be made & put to sale after the sayde feaste, after the full waterynge & rackynge straynynge or tenturynge of the same redy to sale, shall holde & conteyne in lengthe xviii yardes & the ynches, as is aforsayd, & in brede one yarde & a nayle, or at the leaste one yarde within the lystes. & also it is ordeyned & establysshed, that every halfe clothe of every of the sayde hole clothes, streytes, & kerseys, shall kepe his measure in length & brede after the rate fourme & nature of his hole clothe aforsayde. & that no persone, whiche shall make or cause to be made any maner wollen clothe to sel after the said feaste shall medle or put in or upon the same cloth, nor the wolle, whereof the sayd clothe shall be made, any lambes wolle, flockes or corke in any maner, upon payne to forfayt xx_s._ for every clothe or halfe clothe, wherein & wherupon any such lambes wolle, flockes or corke shall be put or medled. The one