Pariter ex textu Sacræ Scripturæ, =Gen.=, c. 6, v. 4, habemus quod gigantes nati sunt ex concubitu filiorum Dei cum filiabus hominum, et hoc ad litteram sacri textus. Gigantes autem homines erant =statura magna=, ut eos vocat Baruch, c. 3, v. 26, et excedente communem hominum proceritatem. Monstruosa statura, robore, latrociniis, et tyrannide insignes: unde Gigantes per sua scelera fuerunt maxima, et potissima causa Diluvii, ait Cornelius a Lapid. =in Gen.=, c. 6, v. 4, =§ Burgensis=. Non quadrat autem quorumdam expositio, quod nomine filiorum Dei veniant filii Seth, et vocabulo filiarum hominum filiæ Cain, eo quod illi erant pietati, Religioni, et cæteris virtutibus addicti, descendentes autem a Cain vice versa: nam salva opinantium, Chrysost., Cyrill., Theodor. Rupert. Ab. et Hilar. in Psalm. 132, apud Cornel., a Lap., c. 6; G., v. 2, =§ Verum dies=, reverentia, talis expositio non cohæret sensui patenti litteræ; ait enim Scriptura, quod ex conjunctione talium nati sunt homines monstruosæ proceritatis corporeæ: ante illam ergo tales gigantes non extiterunt: quod si ex ea orti sunt, hoc non potuit esse ex eo, quod filii Seth coivissent cum filiabus Cain, quia illi erant staturæ ordinariæ, prout etiam filiæ Cain, unde oriri ex his naturaliter non potuerunt nisi filii staturæ ordinariæ: si ergo monstruosa statura filii nati sunt ex tali conjunctione, hoc fuit, quia non fuerunt prognati ex ordinaria conjunctione viri cum muliere, sed ex Incubis dæmonibus qui ratione naturæ ipsorum optime possunt vocari filii Dei, et in hac sententia sunt Philosophi Platonici, et Franciscus Georgius Venetus, tom. 1, problem. 74: nec dissentiunt ab eadem Joseph. Hebræus, Philo Judæus, S. Justinus Martyr, Clemens Alexandrinus, et Tertullianus, Joseph. Hebræus, =Antiq.=, l. 1.; Philo, l. =de Gigant.=; S. Justinus M., Apolog. 1.; Clemens Alex., lib. 3; Tertull., lib. =de Habit. Mul.=, apud Cornel., loc. cit.; Hugo de S. Victor., =Annot. in Gen.=, c. 6, qui opinantur illos fuisse Angelos quosnam corporeos qui in luxuriam cum mulieribus delapsi sunt: ut enim infra ostendemus, istæ duæ sententiæ in unam et eamdem conveniunt.