YOKLE. Well, hob yusht noch a wennig gadult, und ferrup mich net. Ich expect es gait bol besser— HENNER. So husht du shon long gsaut. Won’s net ware os dy frau, dee Frany, alendig ware, don het ich net _so_ long g’wart. YOKLE. Wart noch a wile. Ich bin sure os es all recht wert eb long. HENNER. Won es noch ware os wee’s for yora zurick wor ep dos dee ferdulta fry shoola und may machina und oll dee socha in der gong komma sin, und du hetsht besser g’shpawrt—ovver ich will der noch 4 wocha zeit gevva. Ich mus ovver gay. (_Exit._) YOKLE. (_Alone._) Won ich yusht seller Shwinefelt nee gsana het. Ich hob shon bol $800 in dee inshurance co.’s bezawlt. Won ich selly $800 g’used het for my intressa zu bezawla, het ich ols noch wenig ivverich kot for on der haupt sum obzumocha. Do kommt widder ainer for gelt! (_Enter SHWINEFELT._) SHWINE. Well, Yacub, wee sayts ous hite? Sin widder dry [3] death-notices for dich. Dy 'sessment is $23.75. YOKLE. Ich hob miner sex kens. Won du es net uf holta konsht, don missa mir’s fawra lossa. SHWINE. Well, wee is dee grossmommy? Gate see net bol nivver? Ich hob net gedenkt 2 yore zurick os see so long ousholta date. YOKLE. See is graut aye zeit wee dee onner. SHWINE. Denksht net 'swar zeit see date nivver gay? YOKLE. Mer darf see evva doch net dote shlawga. SHWINE. O, nay! Ovver won mer eera Awdorn tay shtork mocha date! See kent mol shnell shtarwa, waisht, om mawga gromp, oder eppes so. YOKLE. Wos in der welt mainsht du? SHWINE. Du fershtaist’s, denk ich. Won see dote ginkt, data meer, du und ich, $10,000 zeaga, saysht? No ken shreef, ken assignee, ken ufbrecherye! Und see is anyhow olt genunk for op zu passa. YOKLE. Yaw, ovver wee kent mer’s macha? SHWINE. Horich! Ich sawg deer’s! Du gaisht in der shtore und gricksht 10 cent wart mice gift. Ich darf kanes kawfa. Ich hob kay mice, ich board am wartshouse. Ovver du husht rotta, kansht sawga. Du bringsht meer’s peckly und ich psuch eich anes fon denna ovet—sell is all—$10,000 oder uf brecha. Wee sawgsht? YOKLE. (_Walking back and forth._) Ich doos! (_Exeunt both._) SCENE II. _Small sitting room. Best room. Evening. Lamp burning. Sallie seated alone, sewing._ SALLIE. Ich wais gar net wos lets is mit’m dad. Er is gar nimmy der mon wo er wor. Sidder os seller Shwinefelt do hare kommt will es naryets may gay. Hite is er rum g’stonna und rum gluffa os we en dummer older goul. Essa dute are nix may widers, und gshlofa hot er net feel dee letsht nocht, und dee onner nocht aw net. Es doot en ebbes mechtig druvla. (_Enter GUST._) GUST. Well, well, Sallie, olford busy. (_Kisses her and seats himself near._) SALLIE. Yaw, Gust, ich _mus_ busy sy. Du waisht de mam kon nix shoffa wayga der rummadiz for so long. Und dort is dee grossmommy, und dee boova, und der dad druvelt sich so wayga eppes, und ich wase net forwos. Sis gar nimmy in unsererm house we’s war. (_Bursts into tears. GUST puts arm around her, strokes her hair in a comforting manner._)