Ia wa, olelo aku la o Liloa i ko Umi manawa i loaa ai ia ia, i kona poe a pau loa: “Ia kakou i hele ai i ke kapu heiau, a hoi mai au me ka malo ole, he malo laui ko’u ia la, a ua kapa mai oukou ia’u he hehena, aka, eia ua malo la o’u, a me ka niho palaoa, ka laau palau. Ua waiho au no kuu keiki, oia keia.” Ia wa, ike na mea a pau loa he keiki o Umi na Liloa. I aku o Liloa i kona poe kanaka: “E kii aku i kona mau akua, a e lawe mai i mua o Umi, e oki i kona piko.” A hiki mai la na akua o Liloa ooki ia iho la ko Umi piko, a hookani no hoi ka pahu kapu. Ma keia kani ana o ka pahu, lohe o Hakau ke keiki mua a Liloa. Ninau mai la ia i na kanaka: “He pahu aha keia e kani nei?” “He pahu ooki no ka piko o ke keiki hou a ke ’lii, Umi kona inoa.” A lohe o Hakau, hele mai la ia me ka huhu ia Umi, a ninau mai la ia Liloa: “O kau keiki hou keia?” Ae aku o Liloa me ka olelo oluolu ia Hakau: “Ae, o oe no ke ’lii, o kou kanaka keia, maluna oe, malalo keia.” Ma keia mau olelo hooluolu a Liloa i kana keiki ia Hakau, ua oluolu o Hakau me ke ano hookamani ia Umi. Ma keia noho pu ana o Umi me Liloa, ua malama loa o Umi i ka Liloa mau olelo i na la a pau loa, a ua aloha o Liloa ia Umi. O kona kaikuaana hoi o Hakau, ua nui kona hana ino i kona kaikaina, a hiki i ka la i make ai ko laua makuakane o Liloa. Mamua ae o ko Liloa make ana, hooili aku la ia i na aina a pau o Hawaii, no kana keiki hiapo no Hakau. O ka hale akua a me ke ’kua, oia kana i hooili no kana keiki muli, no Umi. A make o Liloa, noho iho o Hakau ma na aina a pau o Hawaii, a o kona kaikaina o Umi, malalo aku no ia o kona kaikuaana. Ia laua e noho ana, he nui loa ko Hakau huhu ia Umi, ma na mea a pau loa, ina e hee o Umi i ko Hakau papa, alaila, olelo mai o Hakau ia Umi: “Mai hee oe i kuu papa heenalu, no ka mea, aohe alii o kou makuahine. Pela ka malo.” Pela no ka noho inoino ana o Hakau ia Umi, a kipaku okoa ia Umi, alaila, hele aku la o Umi me kona mau hoa hele, o Omaokamau, o Piimaiwaa. Ia lakou i pii aku ai mai Waipio aku a ka pali o Koakea, a hala ia, hiki i Kukuihaele, alaila, loaa o Koi, alaila, hele pu oia me Umi. Mai laila aku lakou a Kaumoalii, a Koholalele, Kealakaha, oia kona wahi i hanau ai, a malaila kona makuahine e noho ana o Akahiakuleana. Aka, aole nae lakou i kipa ma laila, hele kuewa wale aku la no lakou me ka malihini. Hele aku la lakou a noho ma ka palena o Hilo me Hamakua, oia ka aina o Waipunalei, no ka aui ana o ka la, kipa ae la lakou ma laila e noho ai. Aia hoi he nui na kaikamahine maka palupalu o laila e noho ana, ike mai la lakou i ka maikai o Umi ma, lalau mai la ia lakou i mau kane. A o Umi hoi, no ka oi o kona kanaka maikai i mua o kona mau hoa hele, nolaila, elua ana wahine. I ko lakou noho ana i laila, hooholo iho la ko lakou manao, e huna ia Umi, a e hoonoho ia ia me ka hana ole i kela mea i keia mea, a noho wale iho la o Umi, e like ma ko lakou manao.