Ma keia noho ana o lakou i laila, hele aku la o Omaokamau, o Piimaiwaa, o Koi, i ka mahiai i ka aina o ko lakou makuahunowai, a ma ko lakou mahiai ana, mahalo mai la ko lakou makuahunowai i ka ikaika i ka mahiai. Aka, o ko Umi mau makuahunowai, kaumaha ko laua manao, no Umi, i ka mahiai ole. A mahope o laila, hele aku la lakou ma Laupahoehoe-kai, e auau kai ai. MOKUNA III. KO UMI NOHO ILIHUNE ANA. He akamai loa o Umi i ka heenalu ana, i kona wa e noho ilihune ana ma Laupahoehoe. Ia ia e heenalu ana, heihei iho la laua o Paiea, he kanaka akamai i ka heenalu, no Laupahoehoe. I ko laua wa e heihei ana, hooke loa o Paiea ia Umi i ka papa heenalu, a eha loa ko Umi poohiwi. Nolaila lilo ia i hala no Paiea e make ai ia Umi i ka wa e puni ai o Hawaii ia Umi. A hiki i ke kau aku o Laupahoehoe, holo aku la o Omaokamau, o Piimaiwaa, o Koi, i ka hoehoe me kamaaina o laila, a loaa mai la ka lakou aku, olioli iho lakou mau makuahunowai; aka, o ko Umi mau makuahunowai, kaumaha loa laua, no ka laua hunona, i ka loaa ole o ke aku. Nolaila, olelo mai ko Umi mau makuahunowai i na wahine a Umi: “Ina paha ka puipui o ka olua kane a e ikaika ana i ka hoewaa, aina ke aku, make hewa ko olua kino ia ia.” Mahope o laila, olelo mai la kekahi mau kamaaina ia Umi, e holo e kaohi waa na lakou, ae aku la no o Umi i ka lakou olelo, a holo aku la. Ma keia holo ana o Umi i ke kaohi aku, a hoi mai la, haawi ia mai la kana aku, malalo mai o ka lemu ka haawi ana mai a ka lawaia. A ike o Umi, haalele aku la ia ia aku, aole i lawe mai, aka, kuai o Umi ia aku me kekahi mea aku e ae, no ko Umi ike ana malalo mai ka haawi ana mai. Nolaila, olelo aku la o Umi: “Eia kau aku o ka’u, he ia nui keia, he uuku kau.” A pono ae la keia mea. Aole o Umi i ai i ua ia nei, hoihoi aku la no ia a haawi na kona akua, na Kaili, aia no ma Hokuli kona wahi i huna ai, me ka ike ole ia. He mea mau ia Umi, ka holo i ke kaohi waa, a me ka lawe i aku na kona akua na Kaili, ma ua wahi la i olelo ia maluna. Eia hoi ka mea haohao loa ia, o ka pio mau o ke anuenue i luna o ia wahi. Nolaila, haohao o Kaoleioku, a manao iho la o Kaoleioku, o Umi ka i laila, no ka mea, ua lohe ia ko Umi nalowale ana. Alaila, hopu iho la o Kaoleioku i ka puaa a iho mai la e ike ia Umi. A hiki ia, nana aku la ia i ke kino o Umi, he kino hanohano, a kohu alii, a paa iho la kona manao o Umi. Alaila, lalau iho la o Kaoleioku i ka puaa, a kaumaha aku la ia Umi, penei: “Eia ka puaa e ke akua, he puaa imi alii.” A pau ke kaumaha ana a Kaoleioku i ka puaa, kuu aku la ia i ka puaa a ku ma ko Umi alo, alaila, huli hou mai la ka puaa ia Kaoleioku. Alaila, ninau aku o Kaoleioku: “O Umi no oe?” “Ae,” mai la o Umi, “Ae, owau no.” I aku o Kaoleioku: “E hoi kaua i ko’u wahi.” Ae aku la o Umi: “Ae.” Ia wa, ike kona mau makuahunowai a me na kanaka a pau loa, he ’lii ka keia, o Umi, o ka Liloa keiki, ka mea a lakou i lohe iho nei, ua nalowale.