Lawe aku la o Kaoleioku ia Umi, a lilo ae la i alii nana, a noho iho la me ia. Ia wa, hana o Kaoleioku i mea e lilo ai ke aupuni no kana alii no Umi, no ka mea, ua maopopo ia ia, he ’lii nui o Umi, a e ku ana i ka moku o Hawaii, a e loaa ana no hoi ia ia ka pomaikai. Hanai iho la ia i na kanaka, ka holoholona, mahiai, ao i ka oo ihe; kukulu i mau hale ao i ke ano kaua, a me na mea a pau loa. A no loko mai o keia ao ana, na kanaka akamai a koa hoi, oia o Koi, Omaokamau, Piimaiwaa. Ma keia noho ana he nui loa na kanaka o ka hale hookahi, eha kaau ka nui (ua like me 160 i ka hale hookahi), pela a pau na kaau hale eha. Pela o Kaoleioku i hoomakaukau ai no kana alii, no Umi, no ko Kaoleioku manao e lilo ana ke aupuni no kana alii no Umi. MOKUNA IV. NO NUNU A ME KAKOHE. He mau elemakule kahuna laua na Liloa, i kona wa e ola ana, a he mau punahele nana, a pela no i ka noho ana o Hakau kana keiki i alii no Hawaii a puni. Aka, mahope iho o ko Hakau noho alii ana, loaa iho la ua mau wahi elemakule nei i ka mai, nolaila inu iho la laua i ka laau naha, a pau ka inoino o ko laua opu, a me ka mai i loohia mai ia laua. Nolaila, hoouna aku la laua i ke kanaka i o Hakau la. A hiki ua elele la i mua o Hakau, ninau mai la o Hakau: “Heaha mai nei kau?” I aku kela: “I hoouna mai nei na wahi elemakule ia’u i mua ou e ke ’lii, e olelo aku ia oe, i wahi ai, a i wahi ia, i wahi awa no laua, i mea hoopaa i ka noha laau o laua.” A lohe o Hakau i keia mau olelo a ka elele, olelo mai la ia: “O hoi a olelo aku ia laua, aohe ai, aohe ia, aohe awa.” Maanei, e hoomaopopo ai kakou, he punahele keia mau elemakule, oia o Nunu a me Kakohe i na la e ola ana o Liloa. No ka mea, ia laua ka malama o ke ’kua o Kaili, a o ka laua mea e olelo ai, oia ka Liloa e hana ai. Aole e hiki ia Liloa ke kaua, me ka ae ole o ua mau elemakule nei mamua, aole no hoi e hiki ke hana i kekahi mea me ko laua lohe ole. Nolaila, he mau punahele laula na Liloa, a ma ia ano laua i hana aku ai i kana keiki o Hakau. A hoi mai la ka elele, a mua o ua mau elemakule nei, hai mai la i na olelo a pau loa a Hakau; a lohe laua, eha iho la ko laua naau me ka ukiuki loa ia Hakau; nolaila ohumu iho la laua, ma ko laua mau naau, e haawi i ka aina no Umi. I aku o Nunu ia Kakohe: “E aho e pii wale kaua e nana i ka pono o ka Kaoleioku hanai, he pono paha, aole paha.” A hooholo iho la laua i keia olelo, pii aku la laua mai Waipio aku a hiki ma Kukuihaele, malaila aku a Kapulena moe. A ao ae la, pii aku la laua a hala o Honokaa, a Paauhau, moe, malaila aku a Kalopa, a Kaumoali, a Kemau, moe.