Ia laua e moe ana ma Kemau, hiki mua aku la kekahi kanaka i ike ia laua ma ke alanui, i mua o Kaoleioku ma Laupahoehoe, i Hilo, a olelo aku la: “Eia ae na elemakule, o Nunu laua o Kakohe, ke hele mai nei i anei, i ou la.” Ninau aku la o Kaoleioku: “Ahea laua puka mai i Hilo nei?” “Apopo, a kela la aku hiki mai.” “Heaha la ka laua huakai nui e hele mai ai?” I aku ua poe nei: “E hele mai ana e nana i ka pono o kau hanai, a me ka pono ole, no ka mea, ua hana mai nei ka laua hanai, o Hakau, ia laua i na mea pono ole.” A lohe o Kaoleioku a me Umi i keia olelo, olioli loa o Kaoleioku, a pahapaha aku la o Kaoleioku i mua o ka lehulehu, i ka lilo o ka aina no kana hanai no Umi, no ka mea, he kanaka akamai o Kaoleioku i ke kilokilo, a me ka nana ana i ke kino o ke kanaka; nolaila kona apo koke a malama i ke kino o Umi. Nolaila, hana maalea iho la o Kaoleioku i ke ano o kana mau hana, a Umi e hana aku ai i mua o Nunu laua o Kakohe, ke hiki mai laua ma ko Kaoleioku a me ko Umi wahi. I ka po alima o ka la o na elemakule i ke alanui, hoomakaukau iho la o Kaoleioku i ka ai, ka ia, ka puaa, ka moa, ka awa. Kena aku la o Kaoleioku i ke kanaka, e hele e oki i pauku wahie. Ua like kona nui me na anana elua ke apo ae, a o kona loa, ekolo iwilei. A loaa ua pauku ohia nei, olelo aku la o Kaoleioku: “E wawahi a liilii, alaila, pua hou ae o waho a paa, a like no me ka pauku mua.” A o kekahi mau kanaka hoi, e kohi i ka pu awa a puni, a o kekahi mau kanaka hoi, nakinaki iho la i ka puaa a paa i ke kaula a paa. Pela ko Kaoleioku hoomakaukau ana, i hiki ai ia Umi, ke hana i mua o na elemakule, o Nunu laua o Kakohe. Nolaila, ua maalea o Kaoleioku ma keia mau hana a pau loa a kakou e iki nei. Eia ke ano o keia mau hana a Kaoleioku: i ko Umi wa e hoa ai i ka umu o ka puaa, alaila, e lalau oia i ka wahie, a kaka iho i ka pauku, o ka wa ia e helelei liilii ai, ma o a maanei, alaila, e manao na elemakule he ikaika io, pela ka puaa, ka pu awa. A makaukau keia mau mea a pau loa, alaila, olelo aku o Kaoleioku ia Umi: “E ke ’lii, apopo ka la o ko aina, pa ia oe. E hoolohe mai e ke ’lii, i na e malama oe i keia mau kauoha a’u, apopo pa ka aina ia oe; i malama ole oe, aole e ola keia mau iwi ia oe, kaulai wale ia ae no i ka la.” Ma keia mau olelo a Kaoleioku, ua oluolu ia i ko ke ’lii mau maka, a ua ae aku no oia i na olelo a pau loa, e malama a e hana aku e like me ia. I aku o Kaoleioku ia Umi: “E moe kakou i keia po, a huli ke kau o ke aumoe, pii au i uka i na koele a kaua, me na kanaka a pau loa, aohe kanaka a noho iho me oe, o au wahine wale no ke noho me oe. Ina i hoea mai na wahi elemakule i ke kakahiaka o ka la apopo, i ninau mai ia’u, alaila, e manao oe o laua ia, hoomakaukau aku oe i mua o laua, ma na mea a pau loa.” A pau ke kauoha a Kaoleioku ia Umi, moe iho la lakou a huli ke kau o ka po, pii aku la o Kaoleioku me na kanaka i uka i ke koele, moe iho la o Umi me na wahine a hiki i ke ao ana.