Puka ae la ka la a mahana, oia paha ka hora ewalu, hiki mai la ua mau wahi elemakule nei, o Nunu a me Kakohe. A hiki mai la laua ma kahi o Kaoleioku, nana iho la laua i ka mehameha a me ke anoano kanaka ole, kahea mai la ua mau elemakule nei: “Mehameha na hale ua o Kaoleioku, aohe maaloalo kanaka iki.” Ia laua e kahea ana, lohe aku la o Umi i keia leo, kahea aku la o Umi ia laua: “E komo mai olua maloko nei, aohe kanaka o ko makou wahi nei, ua pau aku nei na kanaka me Kaoleioku i ke kuahiwi i ka mahiai. Owau wale iho nei no koe, i hoonoho ia iho nei au i kanaka no olua e hiki mai ai.” Ma keia leo kahea a Umi ia laua, komo mai la laua i loko. A ike o Umi ua komo laua i loko, puka aku la ia a waho, lalau iho la i ka pauku wahie, amo ae la a kiekie i luna, hahau iho la i lalo i ka ili o ka honua, a naha liilii ae la. Hoa iho la o Umi i ke ahi, a nui ae la ka uwahi, no ka nui o ka pulupulu i hoolako ia, nolaila nui loa ka uwahi, a ike ole na wahi elemakule i ke kau ana o ka wahie. Hopu aku la o Umi i ka puaa, a alala iho la, hookuu ia aku la no aole i make. O kahi i hookuu ia ai ka puaa, ma kahi nui o ka uwahi. A pau ka a ana o ka pulupulu, kalua iho la keia o ka mauu wale no. A nalo ka umu, kii aku la o Umi i ka pu awa, a huhuki ae la a hemo. A ike o Nunu laua o Kakohe i keia mau hana a Umi, i aku kekahi i kekahi: “Ina me neia ka hanai a Kaoleioku, ola na iwi. Kai ke kanaka ikaika i keia.” O ke kumu o ko laua mahalo ana, o ka naha o ka pauku ohia i ka hahau hookahi ana, o ka hikiwawe o ke kalua puaa ana, o ka huhuki ana i ka pu awa. A huhuki o Umi i ka pu awa, a hemo ae la, hoi ae la ia a ma kekahi aoao o ka hale a ua mau elemakule la e noho ana, wawahi iho la a liilii, kukulu ke kanoa, a waiho iho la i ka awa i wali mua i loko o ke kanoa. Kii aku la o Umi i ka puaa i kalua mua ia, ma kahi o ka umu ana i kalua hope iho ai, huai ae la o Umi, a lawe mai la i mua o ua mau elemakule nei. Ua hele a moa lea loa ka puaa. Ia Umi e huai ana, i aku o Nunu ia Kakohe: “Hikiwawe ka moa o ka puaa, o ke kalua ana aku nei no la.” A waiho ka puaa, kii aku la o Umi i ka awa, a nini iho la i mua o ua mau elemakule nei; elua apu awa. Haawi aku la o Umi i ua mau wahi elemakule nei, inu ae la laua, a pau, ai iho la i ka puaa, mahope o ka ai ana, ooki mai la ka ona o ka awa ia laua, a waiho iho la laua me ka ona. Hina aku la kekahi ma kahi moe a waiho, o kekahi hoi ma ka paia o ka hale. Lalau iho la o Umi, a hapai ae la i ka mea i hina ma ka paia, a hoihoi ae la ma kahi moe. A moe laua, pii aku la o Umi i o Kaoleioku, ma ke kuahiwi, kahi a lakou e mahiai ana me na kanaka a pau loa. A hiki o Umi, ninau mai la o Kaoleioku: “Ua hiki mai na elemakule?” Ae aku o Umi: “Ae. Ua hiki mai laua, a ua hoomakaukau aku nei au i na mea a pau au i kauoha mai ai, a ua ona ua mau elemakule la, haalele aku nei au e moe ana.”