A lohe o Kaoleioku i keia mau olelo a Umi, olelo aku ia ia Umi: “E noho kaua me na kanaka ou, a aui ae ka la, hoi kaua. Penei nae ka hoi ana o kakou. Owau mamua, o na kanaka mahope o’u, o oe mahope loa o ka huakai.” Ua oluolu ia olelo ia Umi. O ke kumu o keia hana ana a Kaoleioku pela, i hiki mua ia a kamailio me na elemakule, no ka ninau ia Umi. A na Kaoleioku ia e olelo aku i ke ano a me ka helehelena o Umi, i ole e kuhihewa laua, i kela kanaka, keia kanaka, o Umi, no ka mea, o Kaoleioku, ua kamaaina i ko laua maka. Ia Umi i hala ai i uka moe iho la ua mau elemakule nei a ala ae la, kamailio iho la laua: “Aole me keia ko kaua mau haku o ka noho ana, ia Liloa, a hala ia i ka make. Ia Hakau hoi, he ai, he ia, he kapa, ka mea loaa ia kaua. O ko kaua wahi hale he pelapela. A o keia a kaua e noho nei, he oi keia a kaua e ike nei; mai ko kaua wa ui, a ko kaua wa hapauea, loaa ia kaua ka makana maikai; i ko kaua wa ui, aole i loaa.” A aui ae la ka la (o ka hora elua paha ia), hiki mai la ka maka mua o ka huakai, nana aku la laua (na elemakule), o Kaoleioku mamua o ka huakai. Nui loa na kanaka, aole o kana mai, ua mea he nui, aole ike ia o waena a me hope o ka huakai. A hiki mai la ka maka mua o ka huakai, i o laua ala, oia no o Kaoleioku, aloha mai la o Kaoleioku ia laua, aloha aku la laua, pela lakou i uwe iho ai, no ka mea, ua loihi ke kaawale ana, a hui hou lakou. Ma keia huakai kanaka hoi e iho ana, ua mahele o Kaoleioku eha mahele, o ka mua, na kanaka nunui, o ka lua, ka poe malalo iho o lakou, o ke kolu, ka poe poupou aa, o ka ha, o na kamalii, pela kona hookaawale ana. I ka wa e noho ana o Kaoleioku me na elemakule, ninau mai la o Nunu ia Kaoleioku: “Auhea o Umi? Aia anei o kela kanaka maikai la?” I aku o Kaoleioku: “Aole ia, eia ’ku no mahope.” Pela no ka ninau ana, a hala ka huakai nunui o kanaka, a hiki i ka huakai liilii o kanaka, a ka huakai kamalii, poeleele e ka la, nalowale ka ili o kanaka, aia o Umi mahope o ia. No ka ike ole o na elemakule ia Umi, nolaila, olelo aku la laua ia Kaoleioku: “Aole ka maua e ike i ko hanai a poeleele wale.” I mai la o Kaoleioku ia laua: “Aole ka olua i ike i ke kanaka i noho iho nei la?” I mai la ua mau wahi elemakule nei: “Ke kanaka no i noho iho nei la?” “Ae, oia no hoi,” pela aku o Kaoleioku. I mai la na elemakule ia Kaoleioku: “Ka aipuupuu i noho iho nei e hana na maua la?” Ae aku o Kaoleioku: “Ae, na’u no i hoonoho iho nei i mea lawelawe na olua.”