A lohe ua mau elemakule nei i keia mau olelo a Kaoleioku, kaumaha loa ko laua naau, kulou iho la ko laua mau poo i lalo, a ea ae la ko laua mau poo i luna, pane mai ia Kaoleioku: “Aole mea e nalo ai keia hilahila.” Pane aku o Kaoleioku i ua mau elemakule nei: “He ’lii waiwai auanei ia e hoomailani aku ai ia ia, he ’lii ilihune, o kana waiwai no ka lawelawe na olua.” Ia wa, pane mai na elemakule ia Kaoleioku: “Aole a maua waiwai e paa ai ka hope o ke ’lii, hookahi no a maua waiwai nui, o ka aina o Hawaii nei a puni, no ke ’lii ia no Umi.” I aku o Kaoleioku i na elemakule: “Aole paha e lilo ka aina ia Umi; ke ike ae la no olua, aohe nui o na kanaka. Ina paha e kaua, make paha ia Hakau, i ka mea nui o na kanaka, no ka mea, no Hakau wale no o Hawaii a puni.” I mai na elemakule ia Kaoleioku: “Ua make o Hakau, aole ia e ola, aia i ka la e kauila ai ke ’kua, o ia kona la e make ai, aole e pakele. Na maua e hoolale na kanaka e pii i ke kuahiwi, koe iho ke ’lii hookahi wale no, a me ka aipuupuu, o maua no hoi auanei pau no.” Ma keia mau olelo a na elemakule, a Nunu laua o Kakohe, maopopo iho la ia Kaoleioku, e waiwai ana kana alii o Umi, a e lilo ana o Hawaii a puni ia laua me ka eha ole o ka ili, ma ke kaua ana. Noho iho la ua mau elemakule nei a hala eha anahulu a me ka hapa, alaila, manao iho la laua e hoi i lalo nei o Waipio. A makaukau laua e hoi, olelo aku laua ia Kaoleioku a me Umi: “Ke hoi nei maua i keia la, a moe aku i ke alanui, elima la, a hiki i ke ono, hiki maua i Waipio. Nolaila, e noho oukou a hiki i na la o Ole, a me Kaloa, alaila iho ae, no ka mea, ekolu Ole, ekolu Kaloa, aono o oukou la ma ke alanui e hele ae ai. A hiki i ka la o Kane, noho oukou i luna o Waipio, a hiki i kekahi la e ae, oia ka la o Lono, oia ka la e kauila huluhulu ai ke ’kua, a oia hoi ko Hakau la e make ai.” Ma keia mau olelo a pau loa, ua hooholo like lakou a pau. Hoi aku la ua mau elemakule nei a hiki i Waipio, o ke ono ia o ka la, hele aku la laua e ike ia Hakau. Ike mai la o Hakau ia laua, olelo mai la: “Mama ka Hilo.” I aku na elemakule: “Ae.” Aloha aku la laua: “Anoai ke ’lii.” I mai la o Hakau i na elemakule: “Ua ike olua ia Umi?” Ae aku la laua: “Ae, ua ike aku nei maua.” Ninau hou o Hakau: “Pehea kona noho ana?” “Ke noho la no me kona kahu, me Kaoleioku.” I aku na elemakule: “O ko maua mea ia i hoi mai la, e kauila ko akua.” Kahaha mai la o Hakau: “Kahaha, kai no a hoonene kaua, alaila, kauila ke ’kua, aole ka he nene kaua, kauila e no ke ’kua.” I aku na elemakule: “Ua ike aku nei maua i na kanaka o ko kaikaina, ua nui loa, e noho mai paha auanei a kipi mai ia oe, pulapula ko maua mau maka. Nolaila, eia ka wa pono, oi uuku kona mau kanaka.” Ma keia mau olelo a na elemakule, ua oluolu ko ke ’lii manao ia mau olelo. Pau ae la kona kanalua, e manao ana he oiaio ka olelo a na elemakule. Aole ka ’uanei.