A hiki i na la o Ole, a me Kaloa, iho mai la o Kaoleioku, o Umi a me ko laua mau kanaka a pau loa, aole kekahi kanaka i koe aku mahope. A pau na la eono i ke alanui, hiki lakou ma Kemamo maluna pono o Waipio. O Kane ia la, he la kapu ia no ke ’kua o Hakau. Noho iho la lakou ma laila, hana iho la i mau pohaku, e iho pu ai i lalo o Waipio, wahi iho la i ka pohaku a paa i ka laui, me he pai uala ala ke ano, pela na kanaka a pau loa, aohe mea koe. Eia nae ka poe hele wale, aole lawe pohaku ma na lima: O ke ’lii o Umi, o ke kahuna o Kaoleioku, o ke keiki hookama o Koi, o Piimaiwaa, o ka makuakane o Omaokamau. Moe iho la lakou malaila ia po a ao, o Lono ia la, oia ka la e kauila huluhulu ai ke ’kua o Hakau. Olelo mai o Hakau i na elemakule: “I keia kauila huluhulu wale no ko’u noho ko ke ’lii, o na kanaka a pau ke pii i ke kuahiwi.” I mai na elemakule: “Ae, he pono ia, ina na ko kaikaina ke kii mai ia oe; aole, nau ke kii aku ia ia. Ina no ua hewa ka lakou hana ana mai, o ka nui no o kou mau kanaka, make no ia oe, aole e pakele.” A lohe ke ’lii i keia mau olelo, oluolu iho la no ia. Nolaila, noho iho la lakou eha, o ke ’lii o Hakau, o Nunu, o Kakohe, o ka aipuupuu. Ia lakou e noho ana ia kakahiaka, oia paha ka mahana ana ae o ka la, he hora ehiku paha ia, iho mai la o Umi ma ka aoao hikina o ka pali o Waipio, me na kanaka ona. A hiki ka maka mua i lalo o ka muliwai, aole i pau mai o hope o ka huakai. A ike o Hakau i ka malu o na kanaka i ka pali, i aku o Hakau i na elemakule: “He la kauila hoi keia, he la hele no ka no kanaka.” I mai na elemakule: O na kanaka no ou o Hamakua e lawe mai ana i ai nau.” A kokoke loa ka huakai i mua o Hakau, ike aku la ia elima poe hele wale, aohe ukana o na lima, oia o Umi, Kaoleioku, Koi, Piimaiwaa, Omaokamau. I aku o Hakau i na elemakule: “Elima poe auamo ole e hele mai nei.” I aku na elemakule: “Ou poe hoa aina ia.” No ka ike pohihihi o Hakau ia Omaokamau, nolaila, ninau aku o Hakau i na elemakule: “I hea la ko’u wahi i ike ai i ke kanaka mamua e hele mai nei?” I aku na elemakule: “O kekahi hoa aina no hoi paha ia ou, he ’lii hele pinepine hoi oe ma Hamakua nei, nolaila, ua ike no paha oe?” Ae mai la o Hakau, “Ae.” Ia Hakau e olelo ana me na elemakule, hiki mai la ka maka mua i kona alo, a o ka maka hope hoi o ka huakai, i luna o ka pali. Poai ae la ka huakai a puni o Hakau, noho iho la ia i waena konu, he umikumamalua ka puni o Hakau, me ke ku no i luna me na auamo pohaku a lakou, ua paa i ka puolo ia i ka laki, me he pai ai la. Hele mai la o Umi a ku ma ke alo o Hakau. Ike aku la o Hakau ia Umi, ea ae la kona poo i luna, a kulou hou i lalo, kahea aku la o Umi ia Omaokamau. Hele mai la o Omaokamau a ku iho la mahope o Umi. Kena aku la o Umi ia Omaokamau, e kii e pepehi ia Hakau.