“E ke ’lii, e hoolohe mai; Ke ku nei au i mua o kou alo, A me ke alo o kou poe kanaka, Ke hoolilo nei oe e ke ’lii, I kahuna au nou i keia la, E like me kou ike ana ia’u mamua, A ua hooko ia mai i keia wa; A ua kokua mai ke akua ia oe, A ua lanakila oe maluna o ka ilihune, A o oe ke ’lii nui o Hawaii nei. A e noho ana na kanaka malalo ou; Ina e pono kou noho ana alii, Alaila, e mau loa kou alii ana, A ina e like oe me kou kaikuaana Alaila, hoowahawaha ia oe. He hookuli ka make, He hoolohe ke ola.” Mahope o keia mau olelo a Kaoleioku ia Umi, olelo aku la ia, i ke ’lii ia Umi, a me Omaokamau. Maanei e ike ai kakou i ke kupono o ka noho kahuna ana o Kaoleioku na Umi, a maanei e ike ai kakou i ka pololei o na olelo wanana a Kaoleioku i mua o ke ’lii a me na kanaka. I aku o Kaoleioku: “E ke ’lii; e ku i luna.” A ku ae la o Umi i luna. “E Omaokamau, e ku i luna.” Mawaena o laua, ewalu anana ke kaawale, a loaa kekahi i kekahi. O keia hana a Kaoleioku, he hoailona no ke ’lii no Umi, i mea e maopopo ai ka paa o ke aupuni, a me ka ole. Ia laua e ku ana, aia ma ko Omaokamau lima akau, ka laau palau e paa ana, oia o Kaniaupiiikalani. Aole e pahu wale ia ia laau, aia no a pa i ka aina, alaila pahu, ma ke ano hoailona a kahuna. Olelo aku o Kaoleioku ia Omaokamau: “E Omaokamau e, o ko ikaika no a pau loa, pahu i ka piko o ke ’lii.” No ka mea, ua ike o Kaoleioku ia Omaokamau, he kanaka ikaika i ka o ihe. Ia wa, kaikai ae la o Omaokamau i ka laau, a pahu mai la ia Umi, me ka ikaika loa (o “wahie” ka ai). A kokoke i ka piko o Umi, pale ae la o Umi, hala ka ihe mahope; me ka lele no, apo aku la o Umi, a paa aku la ma ka welelau o ka ihe. Ma keia apo ana a Umi i ka ihe, ike mai la o Kaoleioku i ka alo ana o Umi, a me ka apo hou ana i ka ihe, a paa ma kona lima, olioli iho la ia me ka mahalo no Umi. I aku o Kaoleioku ia Umi: “E ke ’lii, ke ike nei au, ua pololei kau hana ana i mua o ko’u mau maka, e like me ka’u mau olelo ao ia oe, e ke ’lii, a me kou mau kanaka, a ke ike nei no hoi au i ke kumu e paa ai kou aupuni me oe. I keia la, ke hoolilo nei au ia’u iho malalo o kou mau kapuai, a ke hai aku nei au i kuu olelo paa i mua ou e ke ’lii, aole mea nana e kaili ae kou aupuni mai kou lima aku.” Alaila, hoakaka aku o Kaoleioku, i kona ike ma ka ouli kahuna i mua o Umi, e like me kona ike oiaio. Wahi a Kaoleioku i ke ’lii, ia Umi: “Ke ike nei au i ko akua; e like me kau pale ana i ka ihe a hala, pela oe e noho ai i kou aupuni a hala ka make. E like me kou apo ana i ka welelau o ka ihe a paa i ka lima, pela e paa ai kou aupuni a ili i kau keiki, kau moopuna, kau pua, kau mamo, a hiki loa i kau mau kawowo hope loa.”