Adeste, Coelitum chori, Laetum sonantes canticum, Dum liber inter mortuos, Christus sepulchrum deserit. Frustra sepulcro milites Apponit insanus furor: Frustra specus gens perfida Firmat sigillis ostium. Inanis absistat metus: Hinc nemo corpus auferet, Sed vi reviviscet sua Qui sponte mortem pertulit. Clausa, sigillis integris, Exire spelunca potest, Quem matris alvo Virginis Effudit illaesus pudor. Ridebat hunc turpi trabe Vesana pendentem cohors: Descendat, inquit, et Deum Illi Patrem fatebimur. At tu, paternis obsequens Ad usque mortem legibus, Orbem sacerdos victima Toto piabas sanguine. Non ille descendit cruce; Plus fecit; ecce mortuus Se reddit ipse lumini, Deo natum jam credite. Da, Christe, nos tecum mori; Tecum simul da surgere: Terrena da contemnere; Amare da coelestia. Sit laus Patri; laus Filio, Qui nos, triumphata nece, Ad astra secum dux vocat: Compar tibi laus, Spiritus. AD LAUDES. Aurora lucis dum novae Spargit polum fulgoribus, Victoris Agni jubilans Orbis triumphos personet. Fuso Redemptor sanguine Piavit orbis crimina: Scissoque sanctuarium Patere dat velamine. Granum solo reconditum Iners manere non potest; Vix mortuum jam germinat: Hinc quanta pullulat seges! Non destruuntur funere, Sed seminantur corpora; Fecit resurgendi viam Surgens ab inferis Deus. Affixa cum Christo cruci, Christo caro commortua, Et ipsa surget splendidis Christi decora dotibus. Da, Christe, nos tecum mori; Tecum simul da surgere: Terrena da contemnere; Amare da coelestia. Sit laus Patri; laus Filio, Qui nos, triumphata nece, Ad astra secum dux vocat: Compar tibi laus, Spiritus. AD PRIMAM, TERTIAM, SEXTAM, ET NONAM. (_In finem Hymnorum._) Da, Christe, nos tecum mori; Tecum simul da surgere: Terrena da contemnere; Amare da coelestia. Sit laus Patri; laus Filio, Qui nos, triumphata nece, Ad astra secum dux vocat: Compar tibi laus, Spiritus. AD VESPERAS. Forti tegente brachio, Evasimus rubrum mare, Tandemque durum perfidi Jugum tyranni fregimus, Nunc ergo laetas vindici Grates rependamus Deo; Agnique mensam candidis Cingamus ornati stolis. Hujus sacrato corpore, Amoris igne fervidi, Vescamur atque sanguine: Vescendo, vivimus Deo. Jam Pascha nostrum Christus est, Hic agnus, haec est victima, Cruore cujus illitos Transmittit ultor Angelus. O digna coelo victima, Mors ipsa per quam vincitur, Per quam refractis inferi Praedam relaxant postibus. Christus sepulcri faucibus Emersus ad lucem redit; Hostem retrudit tartaro, Coelique pandit intima. Da, Christe, nos tecum mori; Tecum simul da surgere: Terrena da contemnere; Amare da coelestia.