_Lubrica Romani dum Tu monumenta pererras Nominis, & tacito saecula lapsa pede: Docte opifex, variis seu vim sermonibus addas, Seu placet artifici pagina picta manu; Quanta vetustatis summae miracula promis, Obrutaque indigno moenia celsa situ! Vindice Te, fossas video procedere longas. Per loca constratum devia ducit iter. Nunc via sublimi conscendit vertice montes, Flumina declivis nunc per aperta ruit. Castra quot immenso retegis constructa labore? Et tua non sinit ars oppida posse mori. Hic mira antiquae pendent compagine portae, Hic tremulo fulget lumine grata pharos. Celsior exsurgit chartis Romana potestas Clara tuis; ultro est fassa ruina decus. Ecce iterum ingenti pandunt curvamine sedes, Et plausu resonant amphitheatra novo. Roma triumphato jamdudum languida mundo Nequicquam invictam se superesse dolet. Nec te dira cohors morborum sola tremiscit, Ast tempus medicas sentit inerme manus. Quantum Roma tibi, quantum Brittannia debet. O ingens patriae, Romulidumque decus! Accipe Phoebea merito dignissime lauro, Sint, quæ das aliis, saecula sera tibi._ I. S. GULIELMO STUKELEY, _M. D._ &c. _Nec sola est medicina Tui, sed Apolline dignam Artem omnem recolis, mente, manuque potens. Non modo restituis senio morbisque gravatos, Ad vitam reddis sæcla sepulta diu. Te Lindensis ager gestit celebrare nepotem, Quæque dedit, patriæ lumina grate refers._ GEOR. LYNN, Interior. Templ. Soc. In Itinerarium Curiosum amici sui charissima viri doctissimi & Cl. Domini +Gulielmi Stukeleii+ M. D. CML. SRS. & Antiquar. Secretar.