_Gratulor inceptum tibi nobile, gratulor illis, Inter quos nomen glorior esse meum: Qui patriæ priscas arteis, loca, nomina, & ipsas Relliquias sancta relligione colunt; Quo brevis ostendis conclusus limite campi, Limite quam nullo clauditur ingenium. Quòque tuos sensus permulcet amore_ +Vetustas+, _Qui nullos casus, ardua nulla fugis. Per salebras asp’ras, per tortas ambitiones, Et cæcos calles, improbe, carpis_ +Iter+. _Stagna lacúsque inter, limosáque pascua Lindi, Romanæ explorans avia strata viæ. Hic ubi sorte dolens, pelagi tot jugera rector Æquoris herbosi non sua, rapta tenet. Plura quidem tenuit, sed jussit Jupiter acres Martigenas patrui vim cohibere sui. Haud secus ac jussi faciunt, partémque receptam Terreni, ut par est, æquoris esse jubent. Cætera raptori quæ nunc manet Ennosigæo, Si quibus est armis, est repetenda tuis. Qui terræ pelagíque adeo declivia monstras, Et quò præcipites Nereus urget equos; Tanta mathematicis se tollit gloria vestra Artibus; at numeris grandior illa meis. Me rapit addictum veterum admiratio rerum, Plenáque deliciis pagina quæque suis. Tu monumenta pius, monumentis adstruis ipsis, Perdita quæ fuerant, posse perire vetans. Quid referam quantum tibi debet Classicus auctor, Qui priscas urbes, castràque prisca doces? Mercator siccis quærens adamantas in oris, Non tam conductam versat avarus humum, Quam tu cum nummos, urnas, & cætera signa Antiquæ effodias indubitata notæ. Nomina, quæ fuerant olim, Romana reducis, Perdita restituens, obsolefacta novans. Nec te, antiquarum tam mira peritia vocum est, Fallunt Teutonici, barbaricique soni. Historiam quantum decoras, si dicere vellem, Historiam videar scribere, non literas._ _Tu das præteritis veluti præsentibus uti, Et redeunt scriptis secula lapsa tuis. Detrahis ancipiti Jano mirabile monstrum, Et recta facie cernere cuncta jubes. Sed dum commendo tua, carmine digna Maronis. Ingenii culpâ detero, scripta, mei. Macte tua virtute esto, patriamque quotannis Quo pede cæpisti demereare._ Vale. R. AINSWORTH. To Dr. +Stukeley+, upon his _Itinerarium Curiosum_.