[12] Intererit multum Divusne loquetur, an Heros: Mercatorne vagus, cultorne virentis agelli: Colchus, an Assyrius: Thebis nutritus, an Argis. [13] Aut famam sequere, aut sibi convenientia finge Scriptor; honoratum si forte reponis Achillem, Impiger, iracundus, inexorabilis, acer, Jura neget sibi nata, nihil non arroget armis; Sit Medea ferox invictaq;, flebilis Ino, Perfidus Ixion, Io vaga, tristis Orestes. [14] Siquid inexpertum scenæ committis, & audes Personam formare novam, servetur ad imum Qualis ab incæpto processerit, & sibi constet. [15] Difficile est proprie communia dicere: tuq; Rectius Iliacum carmen deducis in actus, Quam si proferres ignota indictaq; primus; Publica materies privati juris erit, si Nec circa vilem patulumq; moraberis orbem, Nec verbum verbo curabis reddere fidus Interpres, nec sic desilies imitator in arctum Unde pedem proferre pudor vetet aut operis lex. [16] Nec sic incipies ut Scriptor Cyclicus olim. Fortunam Priami cantabo & nobile bellum; Quanto rectius hic qui nil molitur inepte, Dic mihi Musa virum captæ post tempera Trojæ Qui mores hominum multorum vidit & urbes. [17] Non fumum ex fulgore, sed ex fumo dare lucem Cogitat: [18] Quid dignum tanto feret hic promissor hiatu? Parturiunt montes, nascetur ridiculus mus. [19] Nec reditum Diomedis ab interitu Meleagri, Nec gemino bellum Trojanum orditur ab ovo; ---- & quæ Desperat tractata nitescere posse, relinquit; Atq; ita mentitur, sic veris falsa remiscet Primo ne medium, medio ne discrepet imum. [20] Tu quid ego & populus mecum desideret, audi; Si plausoris eges aulæa manentis, & usq; Sessuri donec cantor, Vos plaudite, dicat, Ætatis cujusq; notandi sunt tibi mores, Mobilibusq; decor naturis dandus & annis. [21] Reddere qui voces jam scit puer, & pede certo Signat humum, gestit paribus colludere, & iram Colligit ac ponit temere, & mutantur in horas. [22] Imberbis juvenis, tandem custode remoto, Gaudet equis canibusq; & aprici gramine campi: Cereus in vitium flecti, monitoribus asper, Utilium tardus provisor, prodigus æris, Sublimis, cupidusq; & amata relinquere pernix. [23] Conversis studiis ætas animusq; virilis Quærit opes & amicitias, infervit honori, Commisisse cavet quod mox mutare laboret. [24] Multa senem circum veniunt incommoda, vel quod Quærit & inventis miser abstinet ac timet uti: Dilator, spe longus iners, avidusq; futuri, Difficilis, querulus, laudator temporis acti Se puero, censor castigatorq; minorum. Multa ferunt anni venientes commoda secum, Multa recedentes adimunt; ne forte viriles Mandentur juveni partes, pueroq; viriles, Semper in adjunctis ævoq; morabimur aptis.