"Sensuyt larbre des batailles qui traicte de plusieurs choses comme de leglise. Et aussi des faictz de la guerre. Et aussi comment on si doyt gouuerner. Imprime nouuellement a Lyon. (Design cut in wood.) ¶ On les vend a Lyon au pres de nostre dame de confort cheulz Oliuier Arnoullet." 4to. black letter, Sign. A. to M. six, in eights. ¶ CY COMMENCE LE PROLOGUE DU LIURE INTITULE LARBRE DES BATAILLES FAICT ET COMPOSE PAR VNG VENERABLE ET RELIGIEUSE PERSONNE MAISTRE HONNORE BONHOR, PRIEUR DE SALON, ET DOCTEUR EN DECRET. A LA saincte couronne de France en laquelle auiourdhuy par lordonnance de Dieu regne Charles cinquesme de ce nom tres bien ayme et par tout le monde redoubte soit donne loz, gloire, et victoire sur toutes seigneuries terriennes. Tres hault Prince, ie suis nomme par mon droict nom HONNORE BONHOR Prieur de Salon, indigne docteur en decret, souuenteffoys ay eu en voulente de faire et compiller, selon mon debile entendement, ce petit liure a lhonneur de Dieu premierement de sa benoiste Mere, et de vostre haulte seigneurie Sire. Et les raisons qui mont esmeu et incite a ce faire sont assez bonnes, selon mon aduis. Premierement, lestat de Saincte Eglise est en telle tribulation et perplexite que si Dieu ny mect remede et vostre Seigneurie, laquelle est acoustumee de acheuer et mettre affin les chieres aduantures de la foy Crestienne, ie ny voy voye ne chemin comme y puisse estre mise bonne ne briefue accordance. La Deuziesme raison si est, que voyez toute Chrestiente si greuee de guerres, haynes, larrecins et discentions, que a grant peine peut on nommer vng petit pays soit une conte ou duche qui bien soyt en paix. La Tierce raison si est, que la terre de Prouuence dont ie suis ne et nourry est de present tellement atournee par le changement de noble seigneurie et pour les diversitez doppinions qui sont entre les nobles et le communes que a grant paine pourroit homme tant fust saige racompter les maulx que les gens du pays pour ce debat seuffrent.