=Hic eciam secundum visionem sompnii describit quasi in propria persona[278] angustias varias que contingebant hiis qui tunc pro securitate optinenda in Turrim Londoniarum se miserunt, et de ruptura eiusdem turris: figurat enim dictam turrim similem esse naui prope voraginem Cille periclitanti.= Cap^m. xvii. Amplius vt vidi quia lex non nouerat orbem, ~Creuit et ex~ variis rumor vbique malis, En stupor in sompnis magis ac magis inde timorem Prouocat, et dubias fert michi sepe vias: Quid facerem metuens, aut quid michi cercius esset Ignorans, oculos sperserat ira meos. Haud procul aspexi nauem, properansque cucurri, Sors mea si forte tucior esset ibi; 1600 Ecceque scala michi patuit, qua scansus in altum, Intraui, que pius dat michi nauta locum. Ingenui sexus alios conscendere nauem Vidi quam plures, quos timor omnis habet: Vix fuit a planta capiti gradus vllus eorum Qui tunc de stirpe nobilitatis erant, Quin maris in medio pauidus conscenderat ille Classem, quo requiem, si foret vlla, petat. Set quid agant alii, semper michi cura remansit Vna, quod a furiis tutus abire queam.[279] 1610 Nauis in ingressu pauida de mente rogaui, Vt michi det faciles vtilis aura vias: Quem mare quemque colunt venti, per vota reclamo, Vt michi det placidum per mare Cristus iter: ‘Tu michi, stella maris, sis preuia, quo ferar vndis; Sit tibi cura mei, te duce tutus ero.’ Cum maris vnda procul a litore nos rapuisset, Nauis et optato flumine carpsit iter, A furiis terre tunc amplius esse quietum Me dixi, set in hoc spes mea vana fuit; 1620 Nam mea quando fuit spes maior vt ipse salutem Consequerer, subito causa doloris adest. Terribilem picea tectus caligine vultum Ether ab excelso commouet arma fretis: Quatuor ora fremunt ventorum sic, quod inermem Anchora non poterat vlla iuuare ratem.[280] Extra se positus madidis Nothus euolat alis, Cuius enim gutte dampna furoris agunt: Quas sibi non poterat terre comprendere virtus, Pendula celestes libra mouebat aquas; 1630 Sic defrenato voluuntur in equora cursu, Quo maris vnda nimis aucta subegit humum. Seuiit in nauem ventis discordibus aura, Et maris in remos vnda coacta ruit; Fit fragor, et densi funduntur ab ethere nimbi, Nauis et est variis exagitata malis. Nuncia Iunonis varios tumefacta colores Induit, et vario more refudit aquas: Nulla set est gutta dulcis quam fuderat, immo Turpis, amara, rudis, vilis, acerba, grauis; 1640 Nil valet ad gustum liquor hic, qui corda bibentum Perforat, et quassat viscera tota simul. O felix, tales qui tunc euaserat ymbres, Qui sunt Stige magis et Flegetonte graves! Ipse tamen naui turbatus semper adhesi, Quam furiens pelagi merserat ira quasi. Huius aque fluuio bubo natat inter alaudas, Nat lupus inter oues, inter honesta nephas.