ASTRONOMUS. En ego stellarum motus et sydera novi, Et fati genus omne scio prædicere coeli. Non potis es mortis duræ præscire sagittas. CURTISANUS. En me Rhoma potens multis suffarsit onustum Muneribus sacris, proventibus, officiisque Non potes his mortis fugiens evadere tela. ADVOCATUS. Causarum patronus ego, producere doctus Lites, et loculos lingua vacuare loquaci Non te lingua loquax mortis subducet ab ictu. JUDEX. Justitiæ judex quia sum, sub plebe salutor. Vertice me nudo populus veneratur adorans. Auri sacra fames pervertere sæpe coëgit Justitiam. Mors te manet æquans omnia falce. PRÆTOR. Prætor ego populi, me prætor nemo quid audet. Accensor causis, per me stant omnia, namque Et dono et adimo vitam, cum rebus honorem. Munere conspecto, quod iniquum est jure triumphat Emitto corvos, censura damno columbas. Hinc metuendus ero superis ereboque profundo. Te manet expectans Erebus Plutoque cruentus. CONSUL. Polleo consiliis, Consul dicorque salutor. Munere conspecto, quid iniquum est consulo rectum Quod rectum est flecto, nihil est quod nesciat auri Sacra fames, hinc ditor et undique fio opulentus Sed eris æternum miser et mors impia tollet. CAUSIDICUS. Causidicus ego sum, causas narrare peritus, Accior in causas, sed spes ubi fulserit auri Ad fraudes docta solers utor bene lingua. Muto, commuto, jura inflecto atque reflecto. Et nihil est quod non astu pervincere possim. Mors æqua expectat properans te fulmine diro. Nec poteris astu mortis prævertere tela. SCABINUS. Ecce Scabinus ego, scabo bursas, prorogo causas. Senatorque vocor, vulgus me poplite curvo, Muneribusque datis veneratur, fronte retecta. Nil mortem meditor loculos quando impleo nummis Et dito hæredes nummis, vi, fraude receptis, Justitiam nummis, pro sanguine, munere, vendo. Quod rectum est curvo, quod curvum est munere rectum Efficio, per me prorsus stant omnia jura. Non poteris duræ mortis transire sagittas. LUDIMAGISTER. En ego pervigili cura externoque labore. Excolui juvenum ingenia, et præcepta Minervæ Tradens consenui, cathedræque piget sine fructu. Quid dabitur fructus, tanti quæ dona laboris? Omnia mors æquans, vitæ ultima meta laboris. MILES AURATUS. Miles ego auratus, fulgenti murice et auro Splendidus in populo. Mors te manet omnia perdens. MILES ARMATUS. Miles ego armatus, qui bella ferocia gessi. Nullius occursum expavi, quam durus et audax. Ergo immunis ero. Mors te intrepida ipsa necabit. MERCATOR. En ego mercator dives, maria omnia lustro Et terras, ut res crescant. Mors te metet ipsa. FUCKARDUS. En ego fuckardus, loculos gesto æris onustos, Omnia per mundum coëmens, vendo atque revendo. Heroës me solicitant, atque æra requirunt. Haud est me lato quisquam modo ditior orbe. Mortis ego jura et frameas nihil ergo tremisco Morte cades, mors te rebus spoliabit opimis. QUÆSTOR.