Ganymedes[337] was a yong ientilman of the Troyens ligne; and a fable seith þat Phebus and he strof togedir in castyng of a barre of yron, and, as Ganymedes myth not withstond the strenght of Phebus, he was slayne wyth þe reboundyng of þe barre Phebus hade lawnchyd so hye that he had lost þe syght þerof. And þerfor it is seyde that þe stryffe is not goode with a strenger and a myghtier than a man is hym selfe, ffor ther may not cumme thereof but grete inconuenyencie. Where a wyse man seith, “To be besy with men þat vse vngracious games, it is a syngne of pride, and communly the ende is angry.” Fore to sey that a man shuld not enforce hym ayens a streynger þan he is hym selfe, it is to vndirstond that the goode sperite shulde not take on hym to stronge pennawnce withowte counsell. Seynt Grigori in his Moralles spekyth hereof and seyth þat penawnce profytteth not, yf it be not discrete, ne the vertue of abstynens is not worthe, yf it be sette in sych wyse that it be scharper than the body may suffre. And þerfor it is to conclude þat no poore person shulde take it on hym withowte counsel off more discrete than hym selfe. Where the wyse man seyth in his Prouerbes, [“Ubi multa consilia, ibi est salus”].[338] LIV. Resemble not to Jasone, that man [Sidenote: f. 38.] The which throuȝ Medee þe fleze wan Off golde, for þe which soon afterwarde He yafe hire right evill guerdon and harde. Jason was a knyght of Grece, þe which went into strawnge cuntreis, that is to sey, into the Ile of Colcos, by the enortyng off his vncle Pelleus, the which of envy desired his deth. There was a chepe[339] þat hadde a flees of golde and it was kepte by enchauntment; but the conquest was so strong that non comme thedir but that lost there lyfe. Medee, the whiche was the kynges doughter of that cuntre, toke so grete loue to Jason þat by the enchauntmentes that sche cowde, off the which sche was a soueren maysteres, she made charmes and lerned Jason enchauntementis by the whiche he whanne the fleese of golde, wereby he hade worchip aboue all knyttes lyvynge, and by Medee was reserued fro deth, to whom he hade promysyd euer to be trwe freende. But efftyr he fayled of hys feyth and loued anothir and left hyr holy[340] and forsoke hir, notwithstondyng she was off soueren beaute. Therfor it is seyde to the good knyght that he shulde not be leke to Jason, the which was vnknowyn and to ontrwe to þat the which hade schewed hym mych goodenes.[341] Wherefor it is to veleyns a thyng for a knyght or any nobill person to be rekeles or evyll knowyng of goodenesse, iff any he hath reseyuyd, be it of lady or off gentylwoman or off ony othir persone; ffor he shulde euere thynke thereon and guerdon it vnto his powere. To this purpose Hermes seith, “Be not slowe ne delayyng to remembre of hym þat hath doone the goode, for thou shuldest euer thynkke thereopon.”