Iohannes se Godspellere awrát, þæt "Sum under-cyning com to Criste, and hine bæd þæt he hám mid him siðode, and his sunu gehælde; forðan þe hé læig æt forðsiðe. Þa cwæð se Hælend to ðam under-cyninge, Gewénd þe hám, þin sunu leofað. He gelyfde þæs Hælendes spræce, and hám siðode. Ða comon his ðegnas him togeanes, and cyddon þæt his sunu gesund wære. He ða befrán on hwilcere tide he gewyrpte. Hí sædon, Gyrstan-dæg ofer midne dæg hine forlét se fefor. Þa oncneow se fæder þæt hit wæs seo tíd on ðære ðe se Hælend him to cwæð, Far ðe hám, þin sunu leofað. Se cyning gelyfde ða on God, and eal his hired." Drihten nolde gelaðod lichamlice siðian to þæs cyninges untruman bearne, ac únandweard mid his worde hine gehælde; and he wæs gearo ungelaðod to siðigenne lichamlice mid þam hundredes ealdre. Wel wát gehwá þæt cyning hæfð maran mihte þonne ænig hundredes ealdor, ac se Ælmihtiga Godes Sunu geswutelode mid þære dæde þæt we ne sceolon ða rícan, for heora riccetere wurðian, ac for menniscum gecynde; ne we ne sceolon ða wánnspedigan for heora hafenleaste forseon; ac we sceolon Godes anlicnysse on him wurðian. Se eadmoda Godes Sunu wæs gearo to geneosigenne þone ðeowan mid his andwerdnysse, and he gehælde þone æðeling mid hæse; be ðam cwæð se witega, "Se healica Drihten sceawað þa eadmodan, and þa modigan feorran oncnæwð." Drihten wundrode þæs hundredes ealdres geleafan, na swilce he hine ær ne cuðe, seðe ealle ðing wát, ac he geswutelode mannum his geleafan mid herunge þam þe he wundorlic wæs. Hwanon com se geleafa þam þegene buton of Cristes gife, seðe hine syððan þisum wordum herede? "Soð ic eow secge, na gemette ic swa micelne geleafan on Israhela ðeode." {130} Næs ðis gecweden be ðam heahfæderum oððe wítegum, ac be ðam andwerdan folce, ðe ða-gyt næron swa miccles geleafan. Maria and Martha wæron twa geswystru swiðe on God belyfede: hí cwædon to Criste, "Drihten, gif ðu her andwerd wære, nære ure broðer forðfaren." Þes ðegen cwæð to Criste, "Cweð þin word, and min cniht bið hal. Ic eom man under anwealde gesett, hæbbende under me cempan; and ic secge ðisum, Far ðú, and he færð; to oðrum, Cum ðu, and he cymð; to minum þeowan, Do þis, and he deð. Hu miccle swiðor miht ðu, þe Ælmihtig God eart, þurh ðine hæse gefremman swa hwæt swa ðu wilt!" Drihten cwæð, "Ic secge eow to soðan, þæt manega cumað fram east-dæle and west-dæle, and gerestað hí mid Abrahame þam heahfædere, and Isaáce, and Iacobe, on heofenan rice." Þas word sind lustbære to gehyrenne, and hí micclum ure mod gladiað, þæt manega cumað fram east-dæle middangeardes, and fram west-dæle, to heofenan rice, and mid þam heahfæderum on ecere myrhðe rixiað.