Þurh ða twegen dælas, east-dæl and west-dæl, sind getacnode ða feower hwemmas ealles middangeardes, of þam beoð gegaderode Godes gecorenan of ælcere mægðe to þæra heahfædera wununge, and ealra halgena. Þurh east-dæl magon beon getacnode þa ðe on geogoðe to Gode bugað; forðan ðe on east-dæle is þæs dæges angin. Þurh west-dæl sind getacnode þa ðe on ylde to Godes ðeowdome gecyrrað; forðan ðe on west-dæle geendað se dæg. Ðes æfterfiligenda cwyde is swiðe egefull, "Þa rícan bearn beoð awórpene into ðam yttrum ðeostrum, þær bið wóp and toða gebitt." Ða rican bearn sind þa Iudeiscan, on ðam rixode God ðurh ða ealdan ǽ; ac hí awurpon Crist, and his lare forsawon; and hé awyrpð hí on ða yttran þeostru, ðær bið wóp and toða gebitt. Fela riccra manna geðeoð Gode, swa-þeah, gif hí rihtwise beoð, and mildheorte. Rice man wæs se heahfæder Abraham, and Dauid se mæra cyning, and Zacheus, seðe healfe his æhta þearfum dælde, and mid {132} healfum dæle forgeald be feowerfealdum swa hwæt swa he ær on unriht be anfealdum reafode. Þas rican and heora gelican becumað þurh gode gecyrrednysse to ðam ecan rice, ðe him næfre ne ateorað. Ða sind Godes bearn gecigede, þe hine lufiað swiðor þonne þisne middangeard; and ða sind ða rican bearn gecwedene, ðe heora heortan wyrtruman on ðisum andwerdum life plantiað swiðor þonne on Criste: swylce beoð on þeostru aworpene. Þæt godspel cwyð, "On þa yttran þeostru." Ða yttran þeostru sind þæs lichaman blindnyssa wiðutan. Ða inran þeostru sind þæs modes blindnyssa wiðinnan. Se ðe on ðisum andweardum life is wiðinnan ablend, swa þæt he næfð nan andgit ne hóga embe Godes beboda, he bið þonne eft wiðutan ablend, and ælces leohtes bedæled; forðan ðe he ær his lif aspende butan Godes gemynde. Þa earman forscyldegodan cwylmiað on ecum fyre, and swa-ðeah þæt swearte fyr him nane lihtinge ne deð. Wurmas toslitað heora lichaman mid fyrenum toðum, swa swa Crist on his godspelle cwæð, "Þær næfre heora wyrm ne swylt, ne heora fyr ne bið adwæsced." Þær beoð þonne geferlæhte on anre susle, þa þe on life on mándædum geðeodde wæron, swa þæt þa manslagan togædere ecelice on tintregum cwylmiað; and forlígras mid forligrum, gitseras mid gytserum, sceaðan mid sceaðum, ða forsworenan mid forsworenum, on ðam bradan fire, butan ælcere geendunge forwurðað. Þær bið wóp and toða gebitt, forðan ðe ða eagan tyrað on ðam micclum bryne, and ða teð cwaciað eft on swiðlicum cyle. Gif hwam twynige be ðam gemænelicum æriste, þonne understande he þisne drihtenlican cwyde, Þæt þær bið soð ærist, ðær ðær beoð wepende eagan and cearcigende teð.