Ne gedyde se sacerd þone man hreofligne oððe unhreofligne, ac hé démde þæt he sceolde beon ascyred fram manna neawiste, gif his hreofla wyrsigende wære; oððe betwux mannum wunian, gif his hreofla godigende wære. Swa sceal don se gastlica sacerd: he sceal gerihtlæcan Godes folc, and ðone ascyrian, and amánsumian fram cristenum mannum, þe swa hreoflig bið on mánfullum ðeawum þæt he oðre mid his yfelnysse besmit; be ðam cwæð se apostol Paulus, "Afyrsiað þone yfelan fram eow, ðylǽs ðe an wannhal scep ealle ða eowde besmite." Gif his hreofla bið godigende, þæt is gif he yfeles geswicð, and his ðeawas ðurh Godes ege gerihtlæcð, {126} he hæbbe wununge betwux cristenum mannum, oð þæt he full hal sy on his drohtnungum. Se godspellere cwæð, þæt "Drihten ferde æfter ðisum to anre byrig þe is geháten Capharnaum; þa genealæhte him to sum hundredes ealdor, biddende and cweðende, Drihten, min cniht lið æt hám bedreda, and is yfele geðreatod. Drihten him andwyrde, Ic cume and hine gehæle. Þa andwyrde se hundredes ealdor, and cwæð, Drihten, ne eom ic wyrðe þæt þu innfare under minum hrofe; ac cweð þin word, and min cniht bið gehæled. Ic eom án man geset under anwealde, hæbbende under me cempan; and ic cweðe to ðisum, Far ðu, and he færð; to oðrum, Cum ðu, and he cymð; to minum ðeowan, Do ðis, and he deð. Þa wundrode se Hælend, ðaða hé ðis gehyrde, and cwæð to ðære fyligendan menigu, Soð ic eow secge, ne gemette ic swa micelne geleafan on Israhela ðeode. Ic secge eow to soðum, þæt manega cumað fram east-dæle and west-dæle, and gerestað hí mid Abrahame ðam heahfædere, and Isaáce, and Iacobe, on heofenan rice. Þa rícan bearn beoð aworpene into ðam yttrum þeostrum, þær bið wóp and toða gebitt. Ða cwæð eft se Hælend to þam hundredes ealdre, Far ðe hám, and getimige ðe swa swa ðu gelyfdest. And se cniht wearð gehæled of ðære tide." Þes hundredes ealdor genealæhte ðam Hælende na healfunga, ac fulfremedlice. He genealæhte mid micclum geleafan, and mid soðre eadmodnysse, and snotornysse, and soðre lufe. Micelne geleafan he hæfde, þaþa he cwæð, "Drihten, cweð þin word, and min cniht bið hal." Soðlice he geswutelode micele eadmodnysse, mid þam ðe he cwæð, "Drihten, ne eom ic wyrðe þæt þu innfare under mine ðecene." He hæfde micele snotornysse, þaþa hé understód þæt Crist is æghwær andweard þurh godcundnysse, seðe lichamlice betwux mannum gesewenlic eode. Næs he bedæled þære soðan lufe, ðaða he bæd Drihten for his ðeowan hæle. Manega oðre men bædon Drihten, sume for heora agenre hæle, sume for heora bearna, sume for leofra freonda; {128} ac ðes ðegen bæd for his þeowan hælðe mid soðre lufe; forðan ðe heo ne toscǽt nænne be mæglicere sibbe. Drihten geseah ðises ðegenes menigfealdan godnysse, and cwæð, "Ic cume, and ðinne cniht gehæle."