Her is geræd on þissum godspelle, þe we nu gehyrdon of ðæs diacones muðe, þæt "se Hælend gename onsundron his twelf leorning-cnihtas, and cwæð to him, Efne we sceolon faran to ðære byrig Hierusalem, and þonne beoð gefyllede ealle ða ðing þe wæron be me awritene þurh witegan. Ic sceal beon belǽwed ðeodum, and hí doð me to bysmore, and beswingað, and syððan ofsleað, and ic arise of deaðe on þam ðriddan dæge. Þa nyston his leorning-cnihtas nan andgit þyssera worda. Ða gelámp hit þæt hí genealæhton anre byrig þe is gehaten Hiericho, and ða sæt þær sum blind man be ðam wege; and þaþa he gehyrde þæs folces fær mid þam Hælende, ða acsode he hwa þær ferde. Hi cwædon him to, þæt þæt wære ðæs Hælendes fær. Þa begann he to hrymenne, and cwæð, Hælend, Dauides Bearn, gemiltsa mín. Ða men, þe beforan þam Hælende ferdon, ciddon ongean ðone blindan, þæt he suwian sceolde. He clypode þa miccle swiðor, Hælend, Dauides Bearn, gemiltsa mín. Þa stód se Hælend, and het lædan þone blindan to him. Þaða he genealæhte, þa acsode se Hælend hine, Hwæt wylt ðu þæt ic þe dó? He cwæð, Drihten, þæt ic mage geseon. And se Hælend him cwæð to, Loca nu: þin geleafa hæfð ðe gehæled. And he ðærrihte geseah, and fyligde þam Hælende, and hine mærsode. Þa eal þæt folc, þe þæt wundor geseh, herede God mid micelre onbryrdnysse." Ðyses godspelles anginn hrepode ures Hælendes þrowunge, þeah-hwæðere ne ðrowade hé na on ðysne timan; ac hé wolde feorran and lange ær cyðan his ðrowunge his leorning-cnihtum, þæt hí ne sceoldon beon to swiðe afyrhte þurh ða þrowunge, þonne se tima come þæt hé ðrowian wolde. Heora mód wearð afyrht þurh Crístes segene, ac hé hí eft gehyrte mid þam worde þe hé cwæð, "Ic arise of deaðe on þam ðriddan dæge." Þa wolde he heora geleafan gestrangian {154} and getrymman mid wundrum. And hí ða comon to ðære stowe þær se blinda man sæt be ðam wege, and Crist hine gehælde ætforan gesihðe ealles þæs werodes, to ði þæt he wolde mid þam wundre hí to geleafan gebringan. Þeah-hwæðere þa wundra þe Crist worhte, oðer ðing hí æteowdon þurh mihte, and oðre ðing hí getacnodon þurh geryno. He worhte þa wundra soðlice þurh godcunde mihte, and mid þam wundrum þæs folces geleafan getrymde; ac hwæðre þær wæs oðer ðing digle on ðam wundrum, æfter gastlicum andgite. Þes án blinda man getacnode eall mancynn, þe wearð ablend þurh Adames gylt, and asceofen of myrhðe neoxena-wanges, and gebroht to ðissum life þe is wiðmeten cwearterne. Nu sind we ute belocene fram ðam heofenlican leohte, and we ne magon on ðissum life þæs ecan leohtes brucan; ne we his na mare ne cunnon buton swa micel swa we ðurh Cristes lare on bocum rædað. Þeos woruld, þeah ðe heo myrige hwíltidum geðuht sy, nis heo hwæðere ðe gelicere ðære ecan worulde, þe is sum cweartern leohtum dæge. Eal mancyn wæs, swa we ær cwædon, ablend mid geleaflæste and gedwylde; ac þurh Cristes to-cyme we wurdon abrodene of urum gedwyldum, and onlihte þurh geleafan. Nu hæbbe we þæt leoht on urum mode, þæt is Cristes geleafa; and