we habbað þone hiht þæs ecan lifes myrhðe, þeah ðe we gyt lichamlice on urum cwearterne wunian. Se blinda man sæt æt þære byrig þe is geháten Hiericho. Hiericho is gereht and geháten 'mona.' Se mona deð ægðer ge wycxð ge wanað: healfum monðe he bið weaxende, healfum he bið wanigende. Nu getacnað se mona ure deadlice lif, and ateorunge ure deadlicnysse. On oðerne ende men beoð acennede, on oþerne ende hí forðfarað. Þaða Crist com to ðære byrig Hiericho, þe ðone monan getacnað, þa underfeng se blinda man gesihðe. Þæt is, ðaða Crist com to ure deadlicnysse, and ure menniscnysse underfeng, þa wearð mancyn onliht, and gesihðe underfeng. He sæt wið ðone weig; and Crist cwæð on his godspelle, "Ic eom {156} weig, and soðfæstnys, and líf." Se man þe nan ðing ne cann ðæs ecan leohtes, he is blind; ac gif he gelyfð on þone Hælend, þonne sitt he wið þone weig. Gif he nele biddan þæs ecan leohtes, he sitt ðonne blind be ðam wege unbiddende. Se ðe rihtlice gelyfð on Críst, and geornlice bitt his sawle onlihtinge, he sitt be ðam wege biddende. Swa hwa swa oncnæwð þa blindnysse his modes, clypige he mid inweardre heortan, swá swá se blinda cleopode, "Hælend, Dauides Bearn, gemiltsa mín." Seo menigu þe eode beforan ðam Hælende ciddon ðam blindan, and heton þæt he stille wære. Seo menigu getacnað ure unlustas and leahtras þe us hremað, and ure heortan ofsittað, þæt we ne magon us swa geornlice gebiddan, swa we behofedon. Hit gelimpð gelomlice, þonne se man wile yfeles geswican, and his synna gebetan, and mid eallum mode to Gode gecyrran, ðonne cumað þa ealdan leahtras þe hé ær geworhte, and hí gedrefað his mod, and willað gestillan his stemne, þæt he to Gode ne clypige. Ac hwæt dyde se blinda, þaþa þæt folc hine wolde gestyllan? He hrymde ðæs ðe swiðor, oð þæt se Hælend his stemne gehyrde, and hine gehælde. Swa we sceolon eac dón, gif us deofol drecce mid menigfealdum geðohtum and costnungum: we sceolon hryman swiðor and swiðor to ðam Hælende, þæt he todræfe ða yfelan costnunga fram ure heortan, and þæt he onlihte ure mod mid his gife. Gif we ðonne þurhwuniað on urum gebedum, þonne mage we gedon mid urum hreame þæt se Hælend stent, seðe ær eode, and wile gehyran ure clypunge, and ure heortan onlihtan mid godum and mid clænum geðohtum. Ne magon ða yfelan geðohtas ús derian, gif hi ús ne liciað; ac swa ús swiðor deofol bregð mid yfelum geðohtum, swa we beteran beoð, and Gode leofran, gif we ðone deofol forseoð and ealle his costnunga, ðurh Godes fultum.