Nu þencð menig man and smeað hwanon deofol come; þonne wite he þæt God gesceop to mæran engle þone þe nu is deofol: ac God ne gesceop hine na to deofle; ac þaða he wæs mid ealle fordón and forscyldgod þurh þa miclan up-ahefednysse and wiðerweardnysse, þa wearð he to deofle awend, seðe ǽr wæs mære engel geworht. Ða wolde God gefyllan and geinnian þone lyre þe forloren wæs of þam heofenlicum werode, and cwæð þæt hé wolde wyrcan mannan of eorðan, þæt se eorðlica man sceolde geþeon and geearnian mid eadmodnysse þa wununga on heofenan rice, þe se deofol forwyrhte mid modignysse. And God þa geworhte ænne mannan of láme, and him on ableow gast, and hine gelíffæste, and he wearð þa mann gesceapen on sawle and on lichaman; and God him sette naman Adám, and he wæs þa sume hwile ánstandende. God þa hine gebrohte on neorxna-wange, and hine þær gelogode, and him to cwæð, "Ealra þæra þinga þe on neorxna-wange sindon þu most brucan, and hí ealle beoð þe betæhte, buton anum treowe þe stent on middan {14} neorxna-wange: ne hrepa þu þæs treowes wæstm, forþan ðe þu bist deadlic, gif ðu þæs treowes wæstm geetst." Hwí wolde God swa lytles þinges him forwyrnan, þe him swa miccle oðre þing betæhte? Gyse hu mihte Adám tocnawan hwæt hé wære, buton hé wære gehyrsum on sumum þince his Hlaforde. Swylce God ewǽde to him, "Nast þu na þæt ic eom þin Hlaford and þæt þu eart min þeowa, buton þu do þæt ic þe háte, and forgáng þæt ic þe forbeode. Hwæt mæg hit þonne beon þæt þu forgán sceole: ic ðe secge, forgang ðu anes treowes wæstm, and mid þære eaðelican gehyrsumnysse þu geearnast heofenan rices myrhðu and þone stede þe se deofol of-afeoll þurh ungehyrsumnesse. Gif ðu þonne ðis lytle bebód tobrecst, þu scealt deaðe sweltan." And þa wæs Adam swa wís þæt God gelædde to him nytenu, and deorcynn, and fugelcynn, ðaða he hí gesceapene hæfde; and Adam him eallum naman gesceop; and swa swa hé hí þa genamode swa hí sindon gyt gehatene. Þa cwæð God, "Nis na gedafenlic þæt þes man ana beo, and næbbe nænne fultum; ac uton gewyrcan him gemacan, him to fultume and to frofre." And God þa geswefode þone Adam, and þaþa he slep ða genam he an rib of his sidan, and geworhte of ðam ribbe ænne wifman, and axode Adam hu heo hatan sceolde. Þa cwæð Adam, "Heo is ban of minum banum, and flæsc of minum flæsce; beo hire nama Uirago, þæt is fæmne; forðan ðe heo is of hire were genumen." Ða sette Adam eft hire oðerne naman, Aeua, þæt is lif; forðan ðe heo is ealra lybbendra modor.