Ealle gesceafta, heofonas and englas, sunnan and monan, steorran and eorðan, ealle nytenu and fugelas, sǽ and ealle fixas, and ealle gesceafta God gesceop and geworhte on six dagum; and on ðam seofoðan dæge hé geendode his weorc, and geswac ða and gehalgode þone seofoðan dæg, forðan ðe hé on ðam dæge his weorc geendode. And he beheold þa ealle his weorc ðe he geworhte, and hí wæron ealle swiðe gode. Ealle ðing he geworhte buton ælcum antimbre. He cwæð, "Geweorðe leoht," and ðærrihte wæs leoht {16} geworden. He cwæð eft, "Geweorðe heofen," and þærrihte wæs heofen geworht, swa swa he mid his wisdome and mid his willan hit gedihte. He cwæð eft, and het ða eorðan þæt heo sceolde forðlædan cuce nytenu; and hé ða gesceop of ðære eorðan eall nytencynn, and deorcynn, ealle ða ðe on feower fotum gað; ealswa eft of wætere he gesceop fixas and fugelas, and sealde ðam fixum sund, and ðam fugelum fliht; ac he ne sealde nanum nytene ne nanum fisce nane sawle; ac heora blod is heora lif, and swa hraðe swa hi beoð deade, swa beoð hí mid ealle geendode. Þaða he worhte ðone mann Adám, he ne cwæð ná, "Geweorðe man geworht," ac he cwæð, "Uton gewyrcan mannan to ure anlicnysse," and hé worhte ða þone man mid his handum, and him on ableow sawle; forði is se man betera, gif hé góde geðihð, þonne ealle ða nytenu sindon; forðan ðe hí ealle gewurðað to nahte, and se man is ece on anum dæle, þæt is on ðære sawle; heo ne geendað næfre. Se lichama is deadlic þurh Adames gylt, ac ðeah-hwæðere God arærð eft ðone lichaman to ecum ðingum on domes dæg. Nu cwædon gedwolmen þæt deofol gesceope sume gesceafta, ac hí leogað; ne mæg hé nane gesceafta gescyppan, forðan ðe he nis na Scyppend, ac is atelic sceocca, and mid leasunge he wile beswican and fordón þone unwaran; ac he ne mæg nænne man to nanum leahtre geneadian, buton se mon his agenes willes to his lare gebuge. Swa hwæt swa is on gesceaftum wiðerweardlic geþuht and mannum derige, þæt is eall for urum synnum and yfelum geearnungum.