Se getígeda assa and his fola getacniað twa folc, þæt is Iudeisc and hæðen: Ic cweðe, hæðen, forði þe eal mennisc wæs ða-gyt wunigende on hæðenscipe, buton þam anum {208} Iudeiscan folce, þe heold þa ealdan ǽ on ðam timan. Hí wæron getígede, forðan ðe eal mancyn wæs mid synnum bebunden, swa swa se witega cwæð, "Anra gehwilc manna is gewriðen mid rapum his synna." Þa sende God his apostolas and heora æftergengan to gebundenum mancynne, and het hí untígan, and to him lædan. Hú untigdon hi ðone assan and þone folan? Hí bodedon ðam folce rihtne geleafan and Godes beboda, and eac mid micclum wundrum heora bodunge getrymdon. Þa abeah þæt folc fram deofles þeowdome to Cristes biggencum, and wæron alysede fram eallum synnum þurh þæt halige fulluht, and to Criste gelædde. Assa is stunt nyten, and unclæne, and toforan oðrum nytenum ungesceadwis, and byrðen-strang. Swa wæron men, ær Cristes to-cyme, stunte and unclæne, ðaða hí ðeowedon deofolgyldum and mislicum leahtrum, and bugon to þam anlicnyssum þe hi sylfe worhton, and him cwædon to, "Þu eart min God." And swa hwilce byrðene swa him deofol on-besette, þa hí bæron. Ac ðaða Crist com to mancynne, þa awende he ure stuntnysse to geráde, and ure unclænnysse to clænum ðeawum. Se getemeda assa hæfde getacnunge þæs Iudeiscan folces, þe wæs getemed under þære ealdan ǽ. Se wilda fola hæfde getacnunge ealles oðres folces, þe wæs þa-gyt hæðen and ungetemed; ac hí wurdon getemede and geleaffulle þaþa Crist sende his leorning-cnihtas geond ealne middangeard, þus cweðende, "Farað geond ealne middangeard, and lærað ealle ðeoda, and fulliað hí on naman þæs Fæder, and þæs Suna, and þæs Halgan Gastes; and beodað þæt hi healdon ealle ða beboda þe ic eow tæhte." Þæra assena hlaford axode, hwí hí untigdon his assan? Swa eac ða heafod-men gehwilces leodscipes woldon þwyrlice wiðcweðan Godes bodunge. Ac ðaða hí gesawon þæt þa bydelas gehældon, þurh Godes mihte, healte and blinde, and dumbum spræce forgeafon, and eac ða deadan to life arærdon, þa ne mihton hí wiðstandan þam wundrum, ac bugon ealle endemes to Gode. Cristes leorning-cnihtas cwædon, "Se {210} Hlaford behófað þæra assena, and sent hi eft ongean." Ne cwædon hí na Ure Hlaford, ne Ðin Hlaford, ac forðrihte, Hlaford; forðon ðe Crist is ealra hlaforda Hlaford, ægðer ge manna ge ealra gesceafta. Hi cwædon, "He sent hí eft ongean." We sind gemanode and gelaðode to Godes rice, ac we ne sind na genedde. Þonne we sind gelaðode, þonne sind we untigede; and ðonne we beoð forlætene to urum agenum cyre, þonne bið hit swilce we beon ongean asende. Godes myldheortnys is þæt we untigede syndon; ac gif we rihtlice lybbað, þæt bið ægðer ge Godes gifu ge eac ure agen geornfulnyss. We sceolon symle biddan Drihtnes fultum, forðan ðe ure agen cyre næfð nænne forðgang, buton he beo gefyrðrod þurh þone Ælmihtigan.