{248} Se halga Augustinus trahtnode þis godspel, and cwæð, þæt seo niht getacnode þa nytennysse þisre worulde. Þeos woruld is afylled mid nytennysse. Nu sceal forði gehwá arisan of ðære nytennysse, and gan to his frynd, þæt is, þæt he sceal gebugan to Criste mid ealre geornfulnysse, and biddan þæra ðreora hlafa, þæt is, geleafan þære Halgan Ðrynnysse. Se Ælmihtiga Fæder is God, and his Sunu is Ælmihtig God, and se Halga Gast is Ælmihtig God; na ðry Godas, ac hí ealle án Ælmihtig God untodæledlic. Þonne ðu becymst to ðisum ðrym hlafum, þæt is, to andgite ðære Halgan Ðrynnysse, þonne hæfst ðu on ðam geleafan líf and fódan ðinre sawle, and miht oðerne cuman eac mid ðam fedan, þæt is, ðu miht tæcan ðone geleafan oðrum frynd þe þe ðæs bitt. He cwæð, 'cuma,' forðan ðe we ealle sind cuman on ðisum life, and ure eard nis na her; ac we sind her swilce wegferende menn; án cymð, oðer færð; se bið acenned, se oðer forðfærð and rymð him setl. Nu sceal gehwá forði gewilnian þæs geleafan þære Halgan Ðrynnysse, forðan ðe se geleafa hine gebrincð to ðam ecan life. We wyllað eft embe ðone geleafan swiðor sprecan, forðan ðe ðises godspelles traht hæfð gódne tige. Se hiredes ealdor, þe wæs on his reste gebroht mid his cildum, is Crist, þe sitt on heofonum mid his apostolum, and mid martyrum, and mid eallum þam halgum, þe he on ðisum life gefette. We sceolon clypigan to Criste, and biddan ðæra ðreora hlafa. Þeah hé ús þærrihte ne getiðige, ne sceole we forði þære bene geswican. He elcað, and wyle hwæðere forgyfan. Þi hé elcað, þæt we sceolon beon oflyste, and deorwyrðlice healdan Godes gife. Swa hwæt swa man eaðelice begyt, þæt ne bið na swa deorwyrðe swa þæt þæt earfoðlice bið begyten. Se Hælend cwæð, "Gif he ðurhwunað cnucigende, þonne arist se hiredes ealdor, for ðæs oðres onhrope, and him getiðað þæs ðe he bitt, na for freondrædene, ac for his unstilnysse." Þi he cwæð, "Na for freondrædene," forðan ðe nán man nære wyrðe ne þæs geleafan ne ðæs ecan lifes, gif Godes mildheortnys nære {250} ðe mare ofer manncynne. Nu sceole we cnucian, and hryman to Criste, forðan ðe hé wile us tiðian, swa swa he sylf cwæð, "Biddað, and eow bið forgifen; secað, and ge gemetað; cnuciað, and eow bið geopenod." Ælc ðæra ðe geornlice bitt, and þære bene ne geswicð, þam getiðað God þæs ecan lifes.