He cwæð þa oðer bigspel. "Hwilc fæder wile syllan his cilde stán, gif hit hine hlafes bitt? oþþe næddran, gif hit fisces bitt? oððe þone wyrm ðrowend, gif hit æges bitt?" God is ure Fæder þurh his mildheortnysse, and se fisc getacnað geleafan, and þæt æig ðone halgan hiht, se hláf ða soðan lufe. Þas ðreo ðing forgifð God his gecorenum; forðan ðe nan man ne mæg habban Godes rice, butan he hæbbe ðas ðreo ðing. He sceal rihtlice gelyfan, and habban hiht to Gode, and soðe lufe to Gode and to mannum, gif he wile to Godes rice becuman. Se fisc getacnað geleafan, forðan ðe his gecynd is, swa hine swiðor ða yða wealcað, swa he strengra bið, and swiðor batað. Swa eac se geleaffulla man, swa he swiðor bið geswenct for his geleafan, swa se geleafa strengra bið, þær ðær hé æltæwe bið. Gif hé abryð on ðære ehtnysse, he ne bið þonne geleafa, ac bið híwung. Þæt æig getacnað hiht, forði ðe fugelas ne tymað swa swa oðre nytenu, ac ærest hit bið æig, and seo modor siððan mid hihte bret þæt æig to bridde. Swa eac ure hiht ne becom na gyt to ðam ðe he hopað, ac is swilce hé sy æig. Þonne he hæfð þæt him behaten is, he bið fugel. Hláf getacnað þa soðan lufe, seo is ealra mægna mæst, swa swa se hláf bið ealra metta fyrmest. Micel mægen is geleafa, and micel is se soða hiht; þeah-hwæðere seo lufu hi oferswið, forðan ðe heo bið á on ecnysse, and ða oðre twa geendiað. We gelyfað nu on God, and we hopiað to him: eft þonne we becumað to his ríce, swa swa he us behet, þonne bið se geleafa geendod, forðan ðe we geseoð þonne þæt we nu gelyfað. Ure hiht bið eac geendod, forðan ðe we beoð hæbbende ðæs ðe we ær hopedon; ac seo lufu ne ateorað næfre: nu is heo forði heora selest. {252} Seo næddre is geset on ðam godspelle ongean ðone fisc. On næddran híwe beswác se deofol Adam; and æfre hé winð nu ongean urne geleafan: ac seo gescyldnys is æt urum Fæder gelang. Se wyrm ðrowend, þe is geset ongean þæt æig, is ættren, and slihð mid þam tægle to deaðe. Þa ðing ðe we geseoð on ðisum lífe, ða sind ateorigendlice; þa ðe we ne geseoð, and us sind behátene, hi sind éce: strece ðærto þinne hiht, and anbida oðþæt ðu hi hæbbe. Ne loca ðu underbæc; ondræd þe ðone ðrowend þe geǽttrað mid þam tægle. Se man locað underbæc, þe geortruwað Godes mildheortnysse; þonne bið his hiht geættrod mid þæs ðrowendes tægle. Ac we sceolon æigðer ge on earfoðnyssum, ge on gelimpe and on ungelimpe, cweðan, swa swa se witega cwæð, "Ic herige minne Drihten on ælcne tíman." Getimige ús tela on lichaman, getimige ús untela, symle we sceolon þæs Gode ðancian, and his naman bletsian; þonne bið ure hiht gehealden wið þæs wyrmes slege.