Stán is gesett ongean ðone hláf, forðan ðe heardmodnys is wiðerræde soðre lufe. Heardheort bið se mann, ðe nele þurh lufe oðrum fremigan, þær ðær hé mæg. Þæt godspel cwæð, "Gif ge cunnon, þa ðe yfele sind, syllan ða gódnysse eowrum bearnum, hu micele swiðor wile eower Heofonlica Fæder forgyfan gódne gast him biddendum." Hwæt sind ða gód þe men syllað heora cildum? Hwilwendlice gódnyssa, swylce swa þæt godspel hrepode, hláf, and fisc, and æig. Góde sind þas ðing be heora mæðe, forðan ðe se eorðlica lichama behofað þæs fodan. Nu ge, gleawe men, nellað syllan eowrum cildum næddran for fisce, nele eac ure Heofonlica Fæder us syllan þæs deofles geleaflæste, gif we hine biddað þæt he ús sylle soðne geleafan. And ðu nelt syllan ðinum bearne þrowend for ǽge, nele eac God us syllan orwenysse for hihte. And ðu nelt ðinum bearne syllan stán for hláfe, nele eac God us syllan heardheortnysse for soðre lufe. Ac se goda Heofonlica Fæder forgifð us geleafan, and {254} hiht, and ða soðan lufe, and deð þæt we habbað gódne gast, þæt is, gódne willan. Us is to smeagenne þæt word þe he cwæð, "Ge ðe sind yfele." Yfele we sind, ac we habbað gódne Fæder. We habbað gehyred urne naman, "Ge ðe synt yfele." Ac hwá is ure Fæder? Se Ælmihtiga God. And hwilcera manna Fæder is he? Swutelice hit is gesǽd, yfelra manna. And hwilc is se Fæder? Be ðam þe is gecweden, "Nis nan man gód butan Gode anum." Se ðe æfre is gód, he brincð us yfele to gódum mannum, gif we bugað fram yfele, and doð gód. Gód wæs se man gesceapen Adam, ac ðurh his agenne cyre, and deofles tihtinge, he wearð yfel, and eal his ofspring. Se ðe synful bið, he bið yfel, and nán man nis on lífe butan sumere synne. Ac ure góda Fæder us geclænsað and gehælð, swa swa se witega cwæð, "Drihten, gehæl me, and ic beo gehæled; geheald þu me, and ic beo gehealden."