Se ðe gód beon wile, clypige to ðam þe æfre is gód, þæt he hine gódne gewyrce. Se man hæfð gold, þæt is gód be his mæðe: he hæfð land and welan, þa sint góde. Ac ne bið se man gód þurh ðas ðing, butan he mid þam gód wyrce, swa swa se witega cwæð, "He aspende his ðing, and todælde ðearfum, and his rihtwisnys wunað á on worulde." He gewanode his feoh and geihte his rihtwisnysse. He gewanode þæt he forlætan sceal, and þæt bið geiht þæt þæt he habban sceal on ecnysse. Þu herast ðone mancgere ðe begytt gold mid leade, and nelt herigan ðone ðe begytt rihtwisnysse and heofonan rice mid brosnigendlicum feo. Se ríca and se ðearfa sind wegferende on ðisre worulde. Nu berð se ríca swære byrðene his gestreona, and se ðearfa gæð æmtig. Se ríca berð mare þonne he behófige to his formettum, se oðer berð æmtigne pusan. Forði sceal se ríca dælan his byrðene wið þone ðearfan, þonne wanað he ða byrðene his synna, and ðam þearfan gehelpð. Ealle we sind Godes þearfan; uton forði oncnawan þa ðearfan þe us biddað, þæt {256} God oncnawe us, þonne we hine biddað ure neoda. Hwæt sind þa ðe us biddað? Earme men, and tiddre, and deadlice. Æt hwam biddað hí? Æt earmum mannum, and tiddrum, and deadlicum. Butan þam æhtum, gelice sind þa þe ðær biddað, and ðaðe hí ætbiddað. Hú mihtu for sceame æniges ðinges æt Gode biddan, gif ðu forwyrnst ðinum gelícan þæs ðe ðu foreaðelice him getiðian miht? Ac se ríca besihð on his pællenum gyrlum, and cwyð, 'Nis se loddere mid his tættecon mín gelíca.' Ac se apostol Paulus hine nebbað mid þisum wordum, "Ne brohte we nán ðing to ðisum middangearde, ne we nán ðing heonon mid ús lædan ne magon." Gif ríce wíf, and earm acennað togædere, gangon hí aweig; nast ðu hwæðer bið þæs rícan wífan cild, hwæðer þæs earman. Eft, gif man openað deaddra manna byrgynu, nast ðu hwæðer beoð þæs rícan mannes bán, hwæðer þæs ðearfan. Ac seo gytsung is ealra yfelra ðinga wyrtruma; and þa ðe fyligað þære gytsunge, hí dweliað fram Godes geleafan, and hi befeallað on mislice costnunga and derigendlice lustas, ðe hi besencað on forwyrd. Oðer is þæt hwá ríce beo, gif his yldran him æhta becwædon; oðer is, gif hwá þurh gytsunge ríce gewurðe. Þises mannes gytsung is gewreht wið God, na ðæs oðres æht, gif his heorte ne bið ontend mid þære gytsunge. Swilcum mannum bebead se apostol Paulus, "Bebeodað þam ricum þæt hí ne modigan, ne hí ne hópian on heora ungewissum welan; ac beon hí rice on godum weorcum, and syllan Godes ðearfum mid cystigum mode, and God him forgylt mid hundfealdum swa hwæt swa he deð þam earman for his lufon."