Witodlice se man þe deofle geefenlæcð, se bið deofles bearn, na þurh gecynd oððe þurh gesceapenysse, ac ðurh þa geefenlæcunge and yfele geearnunga. And se man ðe Gode gecwemð, he bið Godes bearn, na gecyndelice, ac þurh gesceapenysse and ðurh gode geearnunga, swa swa Crist cwæð on his godspelle, "Se ðe wyrcð mines Fæder willan seðe is on heofonum, he bið min broðer, and min moder, and min sweoster." Forði nu ealle cristene men, ægðer ge ríce ge heane, ge æðelborene ge unæðelborene, and se hlaford, and se ðeowa, ealle hí sind gebroðra, and ealle hí habbað ænne Fæder on heofonum. Nis se welega na betera on ðisum naman þonne se ðearfa. Eallswa bealdlice mót se ðeowa clypigan God him to Fæder ealswa se cyning. Ealle we sind gelice ætforan Gode, buton hwá oðerne mid godum weorcum forðeo. Ne sceal se ríca for his welan þone earman forseón; forðan oft bið se earma betera ætforan Gode þonne se ríca. God is ure Fæder, þi we sceolon ealle beon gebroðru on Gode, and healdan þone broðerlican bend unforedne; þæt is, ða soðan sibbe, swa þæt ure ælc oðerne lufige swa swa hine sylfne, and nanum ne gebeode þæt þæt he nelle þæt man him gebeode. Se ðe ðis hylt, he bið Godes bearn, and Crist, and ealle halige men ðe Gode geðeoð, beoð his gebroðru and his gesweostru. We cweðað, "Pater noster qui es in celis," þæt is, "Ure {262} Fæder ðe eart on heofonum;" forðan þe God Fæder is on heofonum, and he is æghwar, swa swa he sylf cwæð, "Ic gefylle mid me sylfum heofonas and eorðan." And eft þæt halige godspel be him þus cwyð, "Heofon is his þrymsetl, and eorðe is his fot-sceamul." We wendað ús eastweard þonne we us gebiddað, forðan ðe ðanon arist seo heofen: na swilce on east-dæle synderlice sy his wunung, and forlæte west-dæl, oððe oðre dælas, se þe æghwar is andweard, na ðurh rymyt þære stowe, ac þurh his mægenðrymmes andweardnysse. Þonne we wendað ure neb to east-dæle, þær seo heofen arist, seoðe is ealra lichomlicra ðinga oferstigende, þonne sceal ure mód beon mid þam gemyngod, þæt hit beo gewend to ðam hehstan and þam fyrmestan gecynde, þæt is, God. We sceolon eac witan, þæt se synfulla is eorðe geháten, and se rihtwisa is heofen geháten; forðan þe on rihtwisum mannum is Godes wunung, and se goda man bið þæs Halgan Gastes templ. Swa eac ðær-togeanes se fordóna man bið deofles templ, and deofles wunung: forði þonne swa micel is betwux gódum mannum and yfelum, swa micel swa bið betwux heofenan and eorðan.