Seofon gebédu sint on þam Pater noster. On þam twam formum wordum ne synd nane gebedu, ac sind herunga: þæt is, "Ure Fæder þe eart on heofonum." Þæt forme gebéd is, "Sanctificetur nomen tuum:" þæt is, "Sy ðin nama gehalgod." Nis þæt na swá to understandenne, swylce Godes nama ne sy genoh halig, seðe æfre wæs halig, and æfre bið, and hé us ealle gebletsað and gehalgað: ac þis word is swá to understandenne, þæt his nama sy on us gehalgod, and he us þæs getiðige, þæt we moton his naman mid urum muðe gebletsian, and he us sylle þæt geðánc, þæt we magon understandan þæt nan ðing nis swa halig swa his nama. Þæt oðer gebéd is, "Adueniat regnum tuum:" þæt is, on urum gereorde, "Cume ðin ríce." Æfre wæs Godes ríce, and æfre bið: ac hit is swá to understandenne, þæt his ríce beo ofer ús, and he on us rixige, and we him mid ealre {264} gehyrsumnysse underþeodde syn, and þæt ure ríce beo us gelǽst and gefylled, swa swa Crist us behét, þæt he wolde ús éce ríce forgyfan, þus cweðende, "Cumað, ge gebletsode mines Fæder, and gehabbað þæt ríce þæt eow gegearcod wæs fram anginne middangeardes." Þis bið ure ríce, gif we hit nu geearniað; and we beoð Godes ríce, þonne Crist ús betæcð his Fæder on domes dæge, swa swa þæt hálige gewrit cwyð, "Cum tradiderit regnum Patri suo:" þæt is, "Þonne hé betæcð ríce his Fæder." Hwæt is þæt ríce þæt hé betæcð his Fæder, buton ða halgan menn, ægðer ge weras ge wíf, þa þe hé alysde fram helle-wíte mid his agenum deaðe? Þa he betæcð his agenum Fæder on ende þisre worulde, and hí beoð þonne Godes ríce, and mid Gode on ecnysse rixiað, ægðer ge mid sawle ge mid lichaman, and beoð þonne gelice englum. Þæt ðridde gebéd is, "Fiat uoluntas tua sicut in celo et in terra:" þæt is, "Geweorðe þín willa on eorðan swa swa on heofonum." Þæt is, Swa swa englas on heofonum þe gehyrsumiað, and mid eallum gemete to ðe geðeodað, swa eac menn þe on eorðan sind, and of eorðan geworhte, beon hí ðinum willan gehyrsume, and to ðe mid ealre geornfulnysse geðeodan. On þam mannum soðlice gewyrð Godes willa, þe to Godes willan gewyrceað. Ure sawul is heofonlic, and ure lichama is eorðlic. Nu bidde we eac mid þisum wordum, þæt Godes willa geweorðe, ægðer ge on ure sawle ge on urum lichaman, þæt ægðer him gehyrsumige, and he ægðer gehealde and gescylde, ge ure sawle ge urne lichaman, fram deofles costnungum.