{26} He wæs buton synnum acenned, and his líf wæs eal buton synnum. Ne worhte he þeah náne wúndra openlice ǽrðan ðe hé wæs þritig wintre on þære menniscnysse: þa siðþan geceas he him leorning-cnihtas; ærest twelf, þa we hátað apostolas, þæt sind ærendracan. Siþþan hé geceas twá and hund-seofontig, þa sind genemnede discipuli, þæt sind leorning-cnihtas. Ða worhte hé fela wundra, þæt men mihton gelyfan þæt he wæs Godes Bearn. Hé awende wæter to wine, and eode ofer sǽ mid drium fotum, and he gestilde windas mid his hæse, and hé forgeaf blindum mannum gesihðe, and healtum and lamum rihtne gáng, and hreoflium smeðnysse, and hælu heora lichaman; dumbum hé forgeaf getingnysse, and deafum heorcnunge; deofolseocum and wodum hé sealde gewitt, and þa deoflu todræfde, and ælce untrumnysse he gehælde; deade men hé arærde of heora byrgenum to lífe; and lærde þæt folc þe hé to com mid micclum wisdome; and cwæð þæt nán man ne mæg beon gehealden, buton he rihtlice on God gelyfe, and he beo gefullod, and his geleafan mid godum weorcum geglenge; he onscunode ælc unriht and ealle leasunga, and tæhte rihtwisnysse and soðfæstnysse. Þa nam þæt Iudeisce folc micelne ándan ongean his láre, and smeadon hú hí mihton híne to deaðe gedón. Þa wearð án ðæra twelfa Cristes geferena, se wæs Iudas gehaten, þurh deofles tihtinge beswicen, and hé eode to þam Iudeiscum folce, and smeade wið hí, hu he Crist him belǽwan mihte. Þeah ðe eal mennisc wǽre gegaderod, ne mihton hí ealle hine acwellan, gif he sylf nolde; forði he cóm to us þæt hé wolde for ús deað þrowian, and swa eal mancynn þa ðe gelyfað mid his agenum deaðe alysan fram helle-wite. Hé nolde geniman ús neadunge of deofles anwealde, buton he hit forwyrhte; þa hé hit forwyrhte genóh swiðe, þaða hé gehwette and tihte ðæra Iudeiscra manna heortan to Cristes slege. Crist ða geðafode þæt ða wælhreowan hine genámon and gebundon, and on róde hengene acwealdon. Hwæt ða twegen gelyfede men hine arwurðlice bebyrigdon, and Crist on ðære hwile to {28} helle gewende, and þone deofol gewylde, and him of-anám Adám and Euan, and heora ofspring, þone dǽl ðe him ǽr gecwemde, and gelædde hí to heora lichaman, and arás of deaðe mid þam micclum werede on þam þriddan dæge his þrowunge. Cóm þa to his apostolum, and hí gefrefrode, and geond feowertigra daga fyrst him mid wunode; and ða ylcan lare þe hé him ǽr tæhte eft ge-edlæhte, and het hí faran geond ealne middangeard, bodigende fulluht and soðne geleafan. Drihten ða on ðam feowerteogoðan dæge his æristes astah to heofenum, ætforan heora ealra gesihðe, mid þam ylcan lichaman þe hé on þrowode, and sitt on ða swiðran his Fæder, and ealra gesceafta gewylt. Hé hæfð gerymed rihtwisum mannum infær to his rice, and ða ðe his beboda eallunga forseoð beoð on helle besencte. Witodlice hé cymð on ende þyssere worulde mid micclum mægenþrymme on wolcnum, and ealle ða ðe æfre sawle underfengon arisað of deaðe him togeanes; and hé ðonne ða mánfullan deofle betæcð into