Þæt feorðe gebéd is, "Panem nostrum cotidianum da nobis hodie:" þæt is, on urum gereorde, "Syle us nu to-dæg urne dæghwamlican hláf." Þæt is on ðrim andgitum to understandenne: þæt hé us sylle fodan urum lichaman, and sylle eac ure sawle þone gastlican hláf. Se gastlica hláf is Godes bebod, þæt we sceolon smeagan dæghwamlice, and mid weorce {266} gefyllan; forðan swa swa se lichama leofað be lichamlicum mettum, swa sceal seo sawul lybban be Godes láre, and be gastlicum smeagungum. Hraðe se lichama aswint and forweornað, gif him bið oftogen his bigleofa: swa eac seo sawul forwyrð, gif heo næfð þone gastlican bigleofan, þæt sind Godes beboda, on þam heo sceal geðeon and beon gegódad. Eac se gastlica hláf is þæt halige husel, mid þam we getrymmað urne geleafan; and ðurh ðæs halgan husles þýgene ús beoð ure synna forgyfene, and we beoð gestrangode ongean deofles costnunge. Þi we sceolon gelomlice mid þam gastlican gereorde ure sawle geclænsian and getrymman. Ne sceal þeah se ðe bið mid healicum synnum fordón, gedyrstlæcan þæt he Godes husel þicge, buton he his synna ær gebete: gif he elles deð, hit bið him sylfum to bealowe geðyged. Se hláf getacnað ðreo ðing, swa swa we cwædon. An is þæs lichaman bígleofa; oðer is ðære sawle; ðridde is þæs halgan husles ðygen. Þyssera ðreora ðinga we sceolon dæghwamlice æt urum Drihtne biddan. Þæt fifte gebéd is, "Et dimitte nobis debita nostra, sicut et nos dimittimus debitoribus nostris:" þæt is, "Forgif us ure gyltas, swa swa we forgifað þam mannum þe wið us agyltað." We sceolon dón swa swa we on ðisum wordum behatað; þæt is, þæt we beon mildheorte us betwynan, and, for ðære micclan lufe Godes, forgyfan ðam mannum þe wið us agyltað, þæt God Ælmihtig forgyfe us ure synna. Gif we ðonne nellað forgyfan þa lytlan gyltas ðæra manna þe us gegremedon, þone nele eac God us forgyfan ure synna mycele and manega: swa swa Crist sylf cwæð, "Þonne ge standað on eowrum gebédum, forgyfað swa hwæt swa ge habbað on eowrum mode to ænigum men, and eower Fæder, þe on heofonum is, forgyfð eow eowre synna. Gif ge þonne nellað forgyfan mid inweardre heortan þam ðe eow gremiað, þonne eac eower Fæder, ðe on heofonum is, nele eow forgyfan eowre synna; ac he hæt eow gebindan, and on cwearterne settan, þæt is on helle-wíte; and eow ðær deofol getintregað, oðþæt ge habban ealle eowre gyltas geðrowade, oðþæt {268} ge cumon to anum feorðlincge." Is hwæðere getæht, æfter Godes gesetnysse, þæt wise men sceolon settan steore dysigum mannum, swa þæt hi þæt dysig and ða unðeawas alecgan, and þeah ðone man lufigan swa swa agenne broðor.