Þæt sixte gebéd is, "Et ne nos inducas in temptationem:" þæt is, "Ne geðafa, ðu God, þæt we beon gelædde on costnunge." Oðer is costnung, oðer is fandung. God ne costnað nænne mannan; ac hwæðere nán man ne cymð to Godes ríce, buton he sy afandod: forði ne sceole we na biddan þæt God ure ne afandige, ac we sceolon biddan þæt God us gescylde, þæt we ne abreoðon on ðære fandunge. Deofol mót ælces mannes afandigan, hwæðer he aht sy, oððe naht; hwæðer he God mid inweardlicre heortan lufige, oððe he mid híwunge fáre. Swa swa man afandað gold on fyre, swa afandað God þæs mannes mod on mislicum fandungum, hwæðer hé ánræde sy. Genoh wel wát God hu hit getimað on þære fandunge; ac hwæðere se man næfð na mycele geðincðe, buton he afandod sy. Þurh ða fandunge he sceal geðeon, gif he þam costnungum wiðstent. Gif he fealle, he eft astande: þæt is, gif he agylte, he hit georne gebete, and syððan geswíce; forði ne bið nán bót naht, buton þær beo geswicenes. Se man þe gelomlice wile syngian, and gelomlice betan, he gremað God; and swa he swiðor syngað swa he deofle gewyldra bið, and hine þonne God forlæt, and he færð swa him deofol wissað, swa swa tobrocen scíp on sǽ, þe swa færð swa hit se wind drifð. Se goda man swa he swiðor afandod bið swa he rotra bið, and near Gode, oðþæt hé mid fulre geðincðe færð of ðisum life to ðam ecan life. And se yfela swa he oftor on ðære fandunge abryð, swa he forcuðra bið, and deofle near, oðþæt he færð of ðisum life to ðam ecan wite, gif he ær geswican nolde, þaþa he mihte and moste. Forði anbidað God oft þæs yfelan mannes, and læt him fyrst, þæt he his mándæda geswice, and his mód to Gode gecyrre ær his ende, gif he wile. Gif he þonne nele, þæt {270} he beo butan ælcere ladunge swiðe rihtlice to deofles handa asceofen. Forði is nu selre cristenum mannum, þæt hi mid earfoðnyssum and mid geswince geearnian þæt éce ríce and ða écan blisse mid Gode and mid eallum his halgum, ðonne hi mid softnysse and mid yfelum lustum geearnian þa ecan tintrega mid eallum deoflum on helle-wíte. Þæt seofoðe gebéd is, "Set libera nos a malo:" þæt is, "Ac alys us fram yfele:" alys us fram deofle and fram eallum his syrwungum. God lufað us, and deofol us hatað. God us fett and gefrefrað, and deofol us wile ofslean, gif he mót; ac him bið forwyrned þurh Godes gescyldnysse, gif we us sylfe nellað fordón mid unðeawum. Forði we sceolon forbugan and forseon þone lyðran deoful mid eallum his lotwrencum, forðan ðe him ne gebyrað naht to ús, and we sceolon lufian and filigan urum Drihtne, seðe us lǽt to ðam ecan life.