Seofon gebédu, swa swa we ær sædon, beoð on ðam Pater noster. Þa ðreo forman gebédu beoð us ongunnene on ðysre worulde, ac hí beoð á ungeendode on þære toweardan worulde. Seo halgung þæs mæran naman Godes ongann ús mannum þaþa Crist wearð geflæschamod mid ure menniscnysse; ac seo ylce halgung wunað on ecnysse, forðan ðe we on ðam ecan life bletsiað and herigað æfre Godes naman. And God rixað nu, and his ríce stent æfre butan ende, and Godes willa bið gefremod on ðisum life ðurh góde menn: se ylca willa wunað á on ecnysse. Þa oðre feower gebédu belimpað to ðisum life, and mid þisum life geendiað. On ðisum lífe we behófiað hláfes, and láre, and husel-ganges. On þam toweardan lífe we ne behófiað nanes eorðlices bigleofan, forðan ðe we þonne mid þam heofonlicum mettum beoð gereordode. Her we behófiað láre and wisdomes. On ðam heofonlican life beoð ealle ful wíse, and on gastlicre lare full geráde, þa ðe nu, þurh wísra manna láre, beoð Godes bebodum underþeodde. And her we behófiað ðæs halgan husles {272} ðygene for ure beterunge, soðlice on ðære heofonlican wununge we habbað mid us Cristes lichaman, mid þam he rixað on ecnysse. On þyssere worulde we biddað ure synna forgyfenysse, and na on þære toweardan. Se man ðe nele his synna behreowsian on his life, ne begyt he nane forgyfenysse on ðam toweardan. And on ðisum life we biddað þæt God us gescylde wið deofles costnunga, and us alyse fram yfele. On ðam ecan life ne bið nán costnung ne nán yfel; forði ðær ne cymð nán deofol ne nán yfel mann, ðe us mæge dreccan oððe derian. Þær beoð geþwære sawul and lichama, þe nu on ðisum life him betweonan winnað. Ðær ne bið nán untrumnys, ne geswinc, ne wana nanre gódnysse, ac Crist bið mid ús eallum, and ús ealle ðing deð, butan edwite, mid ealre blisse.