An Scyppend is ealra ðinga, gesewenlicra and ungesewenlicra; and we sceolon on hine gelyfan, forðon ðe hé is soð God and ána Ælmihtig, seðe næfre ne ongann ne anginn næfde; ac he sylf is anginn, and he eallum gesceaftum anginn and ordfruman forgeaf, þæt hí beon mihton, and þæt hí hæfdon agen gecynd, swa swa hit þære godcundlican fadunge {276} gelicode. Englas he worhte, þa sind gastas, and nabbað nænne lichaman. Menn he gesceop mid gaste and mid lichaman. Nytenu and deor, fixas and fugelas he gesceop on flæsce butan sáwle. Mannum he gesealde uprihtne gang; ða nytenu he lét gán alotene. Mannum he forgeaf hláf to bigleofan, and þam nytenum gærs. Nu mage ge, gebroðru, understandan, gif ge wyllað, þæt twa ðing syndon: án is Scyppend, oðer is gesceaft. He is Scyppend seðe gesceop and geworhte ealle ðing of nahte. Þæt is gesceaft þæt se soða Scyppend gesceop. Þæt sind ærest heofonas, and englas þe on heofonum wuniað, and syððan þeos eorðe mid eallum ðam ðe hire on eardiað, and sǽ mid eallum ðam þe hyre on swymmað. Nu ealle ðas ðing synd mid anum naman genemnode, gesceaft. Hi næron æfre wunigende, ac God hi gesceop. Þa gesceafta sind fela. An is se Scyppend þe hi ealle gesceop, se ana is Ælmihtig God. He wæs æfre, and æfre he bið þurhwunigende on him sylfum and ðurh hine sylfne. Gif he ongunne and anginn hæfde, butan tweon ne mihte he beon Ælmihtig God; soðlice þæt gesceaft ðe ongann and gesceapen is, næfð nane godcundnysse; forði ælc edwist þætte God nys, þæt is gesceaft; and þæt þe gesceaft nis, þæt is God. Se God wunað on Ðrynnysse úntodæledlic, and on ánnysse ánre Godcundnysse, soðlice oðer is se Fæder, oðer is se Sunu, oðer is se Halga Gast; ac þeah-hwæðere ðæra ðreora is án Godcundnys, and gelíc wuldor, and efen-ece mægenðrymnys. Ælmihtig God is se Fæder, Ælmihtig God is se Sunu, Ælmihtig God is se Halga Gast; ac þeah-hwæðere ne sind ðry Ælmihtige Godas, ac án Ælmihtig God. Ðry hí sind on hadum and on naman, and án on Godcundnysse. Þry, forði þe se Fæder bið æfre Fæder, and se Sunu bið æfre Sunu, and se Halga Gast bið æfre Halig Gast; and hyra nán ne awent næfre of ðam ðe he is. Nu habbað ge gehyred þa Halgan Þrynnysse; ge sceolon eac gehyran ða soðan Annysse. {278} Soðlice se Fæder, and se Sunu, and se Halga Gast, habbað áne Godcundnysse, and án gecynd, and án weorc. Ne worhte se Fæder nán ðing ne ne wyrcð, butan ðam Suna, oððe butan þam Halgan Gaste. Ne heora nán ne wyrcð nán ðing butan oðrum; ac him eallum is án weorc, and án rǽd, and án willa. Æfre wæs se Fæder, and æfre wæs se Sunu, and æfre wæs se Halga Gast án Ælmihtig God. Se is Fæder, seðe nis naðer ne geboren ne gesceapen fram nanum oðrum. Se is Fæder geháten, forðan ðe he hæfð Sunu, ðone ðe he of him sylfum gestrynde, butan ælcre meder. Se Fæder is God of nanum Gode. Se Sunu is God of ðam Fæder Gode. Se Halga Gast is God forðstæppende of ðam Fæder and of ðam Suna. Þas word sind sceortlice gesæde, and eow is neod þæt we hi swutelicor eow onwreon.