Hwæt is se Fæder? Ælmihtig Scyppend, na geworht ne acenned, ac hé sylf gestrynde Bearn him sylfum efen-ece. Hwæt is se Sunu? He is ðæs Fæder Wisdom, and his Word, and his Miht, þurh ðone se Fæder gesceop ealle ðing and gefadode. Nis se Sunu na geworht ne gesceapen, ac he is acenned. Acenned he is, and þeah-hwæþere he is efen-eald and efen-ece his Fæder. Nis na swa on his acennednysse swa swa bið on ure acennednysse. Þonne se mann sunu gestrynð, and his cild acenned bið, þonne bið se fæder mara, and se sunu læssa. Hwí swa? Forði þonne se sunu wyxð, þonne ealdað se fæder. Ne fintst þu na gelice on mannum fæder and sunu. Ac ic ðe sylle bysne, hu ðu Godes acennednysse þy bet understandan miht. Fyr acenð of him beorhtnysse, and seo beorhtnys is efen-eald þam fyre. Nis na þæt fyr of ðære beorhtnysse, ac seo beorhtnys is of ðam fyre. Þæt fyr acenð þa beorhtnysse, ac hit ne bið næfre butan ðære beorhtnysse. Nu ðu gehyrst þæt seo beorhtnys is ealswa eald swa þæt fyr þe heo of cymð; geðafa nu forði þæt God mihte gestrynan ealswa eald Bearn, and ealswa ece swa he sylf is. Se ðe mæg understandan þæt ure Hælend Crist is on ðære Godcundnysse ealswa eald swa his Fæder, {280} hé ðancige þæs Gode, and blissige. Seðe understandan ne mæg, he hit sceal gelyfan, þæt he hit understandan mæge; forðan þæs witegan word ne mæg beon aídlod, ðe þus cwæð, "Buton ge hit gelyfan, ne mage ge hit understandan." Nu habbað ge gehyred þæt se Sunu is of ðam Fæder butan ælcum anginne; forðan ðe he is þæs Fæder Wisdom, and he wæs æfre mid þam Fæder, and æfre bið. Uton nu gehyran be ðan Halgan Gaste, hwæt he sý. He is se Willa and seo soðe Lufu þæs Fæder and þæs Suna, ðurh ðone sind ealle ðing gelíffæste and gehealdene, be ðam is þus gecweden, "Godes Gast gefylð ealne ymbhwyrft middangeardes, and he hylt ealle ðing, and he hæfð ingehýd ælces gereordes." Nis hé geworht, ne gesceapen, ne acenned, ac hé is forðstæppende, þæt is ofgangende, of ðam Fæder and of ðam Suna, þam hé is gelic and efen-ece. Nis se Halga Gast na Sunu, forðan ðe hé nis na acenned, ac hé gæð of ðam Fæder and of ðam Suna gelice; forðan ðe hé is heora beigra Willa and Lufu. Crist cwæð þus be him on his godspelle, "Se Frofor-gást, þe ic eow asendan wille, Gast ðære soðfæstnysse, ðe of minum Fæder gæð, he cyð gecyðnysse be me." Þæt is, He is min gewita þæt ic eom Godes Sunu. And eac se rihta geleafa us tæcð, þæt we sceolon gelyfan on ðone Halgan Gast: he is se liffæstenda God, se gæð of ðam Fæder and of ðam Suna. Hu gæð hé of him? Se Sunu is þæs Fæder Wisdom, æfre of ðam Fæder; and se Halga Gast is heora beigra Willa, æfre of him bám. Is forði þonne án Fæder, seðe æfre is Fæder, and án Sunu, seðe æfre bið Sunu, and án Halig Gast, seðe æfre is Halig Gast.