Ðæra apostola tweonung be Cristes æriste næs na swa swiðe heora ungeleaffulnys, ac wæs ure trumnys. Læs us {302} fremodon þa ðe hraðe gelyfdon, ðonne ða þe twynigende wæron; forðan ðe hi sceawedon and grapodon ða dolhswaðu Cristes wunda, and swa adræfdon ealle twynunga fram ure heortan. Þa ðreade se Hælend his leorning-cnihta twynunge, ðaða hé lichamlice hí forlætan wolde, to ði þæt hí gemyndige wæron ðæra worda þe hé on his siðe him sæde. He cwæð þa, "Farað geond ealne middangeard, and bodiað godspel eallum gesceafte." Godspel is us to gehyrenne, and ðearle lufigendlic, þæt we moton forbugan helle-wite and ða hreowlican tintrega þurh ðæs Hælendes menniscnysse, and becuman to engla werode þurh his eadmodnysse. He cwæð, "Bodiað eallum gesceafte:" ac mid þam naman is se mann ána getacnod. Stanas sind gesceafta, ac hí nabbað nan líf, ne hí ne gefredað. Gærs and treowa lybbað butan felnysse; hí ne lybbað na ðurh sawle, ac ðurh heora grennysse. Nytenu lybbað and habbað felnysse, butan gesceade: hí nabbað nan gescead, forðan ðe hí sind sawullease. Englas lybbað, and gefredað, and tosceadað. Nu hæfð se mann ealra gesceafta sum ðing. Him is gemæne mid stanum, þæt he beo wunigende; him is gemæne mid treowum, þæt he lybbe; mid nytenum, þæt he gefrede; mid englum, þæt he understande. Nu is se mann gecweden 'eall gesceaft,' forðan ðe he hæfð sum ðing gemæne mid eallum gesceafte. Þæt godspel bið gebodad eallum gesceafte, þonne hit bið ðam menn anum gebodad, forðan ðe ealle eorðlice þing sind gesceapene for ðam men anum, and hí ealle habbað sume gelicnysse to ðam men, swa swa we ær sædon. "Se ðe gelyfð, and bið gefullod, he bið gehealden; and se ðe ne gelyfð, he bið geniðerod." Se geleafa bið soð seðe ne wiðcwyð mid þweorum ðeawum þæt þæt he gelyfð; be ðam cwæð Iohannes se apostol, "Se ðe cwyð þæt he God cunne, and his beboda ne hylt, he is leas." Eft cwyð se apostol Iacobus, "Se geleafa ðe bið butan godum weorcum, se bið dead." Eft he cwæð, "Hwæt fremað þe þæt ðu hæbbe geleafan, gif ðu næfst ða godan weorc? Ne mæg {304} se geleafa ðe gehealdan butan ðam weorcum. Deoflu gelyfað, ac hí forhtiað." Þa deoflu gesawon Crist on ðisum life on ðære menniscnysse, ac hi feollon to his fotum, and hrymdon, and cwædon, "Þu eart Godes Sunu, forði ðu come þæt ðu woldest us fordón." Se man ðe nele gelyfan on God, ne nænne Godes ege næfð, he bið wyrsa þonne deofol. Se ðe gelyfð, and hæfð ege, and nele ðeah-hwæðere gód wyrcan, se bið þonne deoflum gelic.